Къудурет берген фахму

Бапыналаны Жамал ишлеген скульптураланы Басхан тары таба озгъан кезиуде жол жанында кёре-кёре тургъанма. Кёп болмай а устаны  кеси бла да танышыр онг чыкъгъанды.

Бизни эллисине къонакъгъа агъачдан уста Къудайланы Исса элтген эди. Артыкъ уллу болмагъан арбазгъа киргенибизде, ол тюрлю-тюрлю скульптураладан бла хобустадан толу болгъаны кёзге уруна эди. Къонакъбай ол кезиуде бизни сакъламагъан эсе да, бек жарыкъ тюбеген эди. Ол ишин бардыргъан  жапмагъа жууукълаша келгенибизде, кёзюм айтхылыкъ жырчыбыз Омарны скульптурасына илинди. Ары дери мен аны бюстдюн бир да кёрмегеним себепденми огъесе автор аны Отар улуна болмагъанча бек ушатханы ючюнмю, билмейме, алай ол манга бек сейир эм аламат кёрюндю. Алыкъын ахырына дери жетдирилмеген скульптурадан къаллай эсе да бир жылыу ура эди: Омар нюр тёге къарайды барыбызгъа да. Башында да аны мухар бёркю барды. Алай Жамал аны алайлай къояргъа огъесе къалпакъгъамы алышырыгъына алыкъын тюшюнмегенди. Мен акъыл этгенден, ол бёркде къалыргъа керекди. Болсада хар художникни да кесини энчи кёз къарамы болгъанын барыбыз да билебиз

- Кёремисе, - дейди Жамал, Омарны суратларын алып келип,- къалпакъ нечик ариу ушап турады. Жюрегим къалпакъда ишлерге тартынады. Болсада бизни таматала мухар бёркле кийгендиле. Ол себепден бошаялмай турама. Дагъыда энтта боюну, имбашлары да ишленирикдиле.

Бапына улуну кесини юсюнден айтханда уа, ол бу ишге бир жерде да окъумагъанын билдиргенди.

- Элли жашыбыз Ахматланы Леуан кёп кере кюрешген эди  окъургъа бар деп. Алай унаталмагъан эди. Бюгюн бек сокъуранама. Фахму игиди, болсада къуру аны бла узакъгъа кетерик тюйюлсе. Мен да кёп затха китапладан бла журналладан юйрене келгенме. Ансыз амал жокъду,- дейди Жамал.

Аны арбазында Кязимни да бир ненча бюстдю барды. Аланы да автор бек ушатып жарашдыргъанды. Бюстледен сора да ол арбазлада, юйледе омакълыкъгъа хайырланнган вазала, тюрлю-тюрлю скульптурала да ишлейди. Аланы къалай тамамлагъаныны юсюнден да бизге толу хапар айтханды. Кертиси бла да, уллу къыйын салыргъа керек болады: темирле, формопласт, гипс…Быланы барысын да бирден табып къояргъа къыйынды. Сёз ючюн, формопластны кёпге къуюп хайырланыр ючюн бир челегин  бир сагъат чакълы заманны къайнатып, жангы балны халине келтирирге керекди. Хауасын солугъан да алай хайырлы тюйюлдю саулукъгъа.

Бек уллу мураты уа Жамалны мастерскойду. Тап жарашдырылгъан жерде ишлерге да тынч боллукъ эди. Уллу заказланы кётюрюрча механизмлени да ол кеси жарашдырады. Бу усталыкъгъа келгенини сылтауу уа 90-чы жыллада къырал да чачылып, иш да болмагъаны бла байламлы эди. Бюгюнлюкде ол кесини жашауун искусстводан айырма кёрмейди.

Къасымланы Аминат.
Поделиться: