Ахча да, фатар да жокъ

Республиканы тёрт инсаны кёп къатлы юйню ишлетиуге  ахчаларын  къошхан 56 адамны алдап, 62 миллион сом къоллу болгъанлары ючюн терсленедиле.

КъМР-де МВД-ны следствие управлениясыны къуллукъчулары республиканы тёрт инсанына ачылгъан терслеу материалланы тинтип бошагъандыла. Ала Гагарин атлы орамда кёп къатлы юйню ишлетебиз деген сылтау бла  ахча жыйып, аны урлагъандыла.

 Ачыкъланнганыча, къурулуш фирма тиширыугъа жазылып эди. Мекямны ишлетиуге жерни аны эри сайлагъанды  эки танышын  да къошханды хыйлалыгъына. Аладан бири фатарла керек болгъан адамланы излегенди, экинчиси уа алыучула бла келишимле этгенди.

 Юй 2019 жылда битдирилип, фатарла иелерине берилирге керек эдиле, болсада хыйлачыла, боюнларына алгъан борчланы толтурмай, ызы бла уа адамланы сорууларына жууапла бермей тохтагъандыла. Следовательле ачыкълагъанларыча, къурулуш аллындан да законсуз  бардырылгъанды.

Терсленнгенле ишлерин 2016 жылдан бери бардыргъандыла.  Аланы хыйлалыкъларын КъМР-де МВД-ны экономика аманлыкълагъа эм коррупциягъа къажау управлениясыны къуллукъчулары тохташдыргъандыла.  Этилген  къоранчланы артха къайтарыр мурат бла  терсленнгенлени мюлклерине арест салыннганды – 100 миллион сомдан артыкъ. 

Бу шартла бла байламлы РФ-ни УК-сыны 159-чу статьясыны 4-чю кесегине кёре уголовный иш ачылгъанды. Ол къабыл кёрюлюп, Нальчикни сюдюню къараууна берилгенди.