Хар жаны бла фахмулу

Газетибизни бюгюннгю байрамгъа жораланнган номеринде къачанда миллетни атын айтдыргъан, аны ёхтемлиги болгъан адамларыны юслеринден айтыучубуз. Мени бюгюннгю жигитим Атталаны Викторну жашы Азнор да ол къауумданды. Бюгюнлюкде таулу жаш «КБР-инфо»  республикалы информация агентствону баш редакторуду. Кёп болмай КъМР-ни Башчысы Казбек Коковну буйругъу бла «Къабарты-Малкъар Республиканы Сыйлы журналисти» деген ат берилгенди.

2000 жылланы аллында кёпле Атталаны Азнорну  аламат ауазлы, фахмулу жырчыныча таный эдиле. Артда уа аны республиканы даражалы къууанчларын бардырыргъа чакъырып тебирейдиле.  Шатык ауазлы жашны республикада ишлеген телеканалла да эслейдиле. Ма алай бла ачылгъанды журналистикагъа жолу.

Азнор кеси Къыргъызда туугъанды. Аланы юйюрлери Кант шахардан узакъ болмагъан Дмитриевка деген элде жашагъанды. Аппасы Сагъыт, юйдегиси ауушхандан сора, Кавказгъа къайтыргъа сюйгенин билдирип, жашыны юйюрюне жолгъа хазырланыгъыз, деп тебирейди. Жашы, келини да ол кезиуде колхозда ишлей эдиле. Аны себепли ишлерин, юйлерин да къоюп, жолгъа атланалмайдыла.

– Алай бла аппам алгъа кеси кетеди. Сора бир кесекден къайтып келип, не мени, не гитче къарындашымы биргесине элтирге сюйгенин билдиреди. Тау адетге кёре, аны ол оноууна угъай деп биреу да айтмады. Мен ол жыл школну бошагъаным себепли уа, аны бла мени жиберирге дейдиле. Ол 1998 жыл эди. Анамдан кёп кере соргъанма сабийинги къалай берип къойгъан эдинг деп. Ма алай бла келгенме Нальчикге, – деп эсгереди ушакъ нёгерим.

Ала Урванда аппасыны тамата къарындашыны юйюнде жашагъандыла. Адамла бла танышыу, байламлыкъла тохташдырыу Азноргъа ал кезиуде тынч тюйюл эди. Кавказгъа келишалмай, юч жылны ичинде артха Къыргъызгъа кетерге деген акъылын бир такъыйкъагъа да унутмай жашагъанды. Биринчи жыл ол бийик билим берген окъуу юйлеге кирирге кечикгени себепли, автомобиль транспортну лицейине окъургъа киреди. Аны къызыл дипломгъа бошап, «Халкъла аралы пассажир улоуланы къураучу» деген усталыкъны алады. «Эсимдеди, дипломуму къоруулагъан кезиуде Москвадан келген, комиссияда олтургъан бир тиширыу диплом ишими сатып окъуна алгъан эди, – дейди Атта улу.

Диплом таматасы Азноргъа окъууун андан ары бардырыргъа, башха шахарланы биринде бийик билим берген окъуу юйге кирирге кереклисин айтады. Алай туудугъун ансыз да аз кёрген Сагъыт унамайды. Алгъан усталыгъына къаршыракъ окъууну сайлай, Азнор КъМКъУ-ну математика факультетине киреди. Анда уа «Студент жаз башы» фестивальлагъа къатышып тебирейди. Фахмулу жашны Амир Кулов эслейди эм кеси ишлеген искусстволаны школуна жыр дерслерине чакъырады, Искусстволаны Шимал Кавказ къырал институтуна кирирге да кёллендиреди.

– Анда да, университетде да окъуууму бардырып, 2007 жылда дипломуму алама. Алай институтдан а, 5 жыл да окъуп, ахырына жетдирмей чыкъгъанма. Болсада бир кюн да сокъуранмагъанма, анда ётдюрген жылларым зырафына кетмегендиле. Ауазымы, сёлешиуюмю да тап къураргъа анда юйреннгенме. Артда «Европа плюс» радиогъа да аладыла, – дейди хунерли жаш.

Институтда окъугъан жылларында Атта улу Москвада жыр искусство жаны бла окъургъа таукел болады. Ары ол Чайковский атлы консерваториягъа кирирге деп барады. 160 адамдан  комиссияны 25 адам ётедиле. Ол санда  Азнор да. Алай конкурсну ючюнчю кесегине тебиреген кезиуюнде, терс троллейбусха олтуруп, башха жанына кетеди.

– Мен ары жетген кезиуде, манга бёлюннген заман ётюп эди. Алай муратым ол залда бир кере окъуна жырларгъа эди да, комиссия аны эркин этген эди. Италиялы тилде арияны айтама, комиссиядагъыла келир жыл къайтып келирими тилейдиле. Алай, къадар болмады, – деп эсгереди ушакъ нёгерим. 

Атасы, анасы эм гитче къарындашы уа Азнорну бери 2005 жылда, жашлары юйюр къурайма деген кезиуде кёчгендиле. Ала 13 октябрьде болгъан жарсыулу ишлени кезиуюне тюшюп, бир кесек абызырагъан эдиле.
2010 жылда уа Азнорну «Россия 1» телеканалгъа орус тилде жангылыкъланы бардырыргъа чакъырадыла. 

– Менича тышындан келип, телевиденияны ишинден хазна ангылауу да болмагъан адамгъа тынч тюйюл эди. Манга анда Гулаланы Жанна бек болушхан эди. Жанна Башировна эфирге бек къаты хазырланнганды. Бир бирде кёлюбюзге окъуна тийиучюсю эсимдеди. Болсада артда ол бек болушхан эди манга. Бек ыразыма аллай тынгылы школну ётгениме аны къолунда, – дейди Азнор Викторович. 

Бир кесекден а Азнор эм дагъыда бир къауум журналист экстремист къауумланы келечилеринден жашауларына къоркъурча билдириуле алып тебирейдиле. Алай бла ишден, республикадан да кетип жашаргъа тюшеди. Къайтхандан сора, аны «1КБР» республикалы телевидениягъа чакъырадыла. Арт эки жылда уа, айтханымча, «КБР-инфо» республикалы информациялы агентствону ышаннгандыла. Кесини бюгюннгю коллективи бла ол бир тил табып ишлейди, ала ишге сюйюп келирча онгла да къурайды. 

– Мен оюм этгенден, адам ишине къууанып келирге керекди. Ол алай болур ючюн а биз, таматала, алагъа аллай онгла къураргъа борчлубуз. Сюймегенлей этилген жумушну къыйматы да чыкъмайды, – деп чертеди ол.