Къуралгъан аманлыкъчы къауумгъа киргенди

РФ-ни МВД-сыны Зольск районда бёлюмюню полициячылары Ставрополь шахардан 20-жыллыкъ жашха ачылгъан   уголовный  ишни тинтип бошагъандыла эмда аны сюдню къараууна бергендиле. 

Ачыкъланнганыча, ол интернетде наркотиклени Ставропольда  жашырын жерледе букъдуруп, алай бла къуралгъан аманлыкъчы къауумгъа кирип, ахча ишлерге ыразылыгъын бергенди. 2022 жылда сентябрьден ноябрьге дери ишекли наркотиклени законсуз сатыу-алыу бла кюрешгенди.

Ол ууну ёнчелеп, чулгъамла этерге, аланы букъдурургъа  борчлу болады. Жаш кеси билдиргенича, наркотиклени Будённовск, Прохладный, Нальчик, Владикавказ эм Черкесск шахарлада букъдургъанды. 2022 жылда 17 ноябрьде анга  Минераловодск районда жашырын жерден  наркотиклени алып, аланы Нальчикде асыраргъа  буйрукъ бергендиле.

18 ноябрьде кече сагъат 24-ге жаш баргъан таксини «Малка» постда полициячыла тохтатхандыла.  Машинада энтта 18-жыллыкъ къыз болгъанды. Жашны кийимлерин тинтген кезиуде  биргесине уулу заты бла 50 чулгъам табылгъанды,  аланы битеулю ауурлугъу 53,1 граммгъа жетгенди.  

Ставропольчу айтханыча, жолгъа чыгъарны аллында ол Будённовск шахарда уулу заты бла алты хуржун букъдургъанды. Ол кёргюзтген жерледен полициячыла наркотиклени тапхандыла.

Полициячыла  жашха РФ-ни УК-сыны 30-чу статьясыны 3-чю кесегине эм 228.1-чи статьясыны 4-чю кесегине кёре терслеу иш ачхандыла.  Интернет бла хайырланып, къуралгъан аманлыкъчы къауумну санында уллу ёлчемледе  наркотиклени законсуз сатыу-алыугъа къатышханы бла байламлы.

Уголов иш терслеу оноу бла Зольск районну сюдюне ашырылыпды, деп билдиредиле КъМР-де МВД-ны пресс-службасындан.