Наркотикле сатханы ючюн - жууапха

КъМР-де Ич ишле министерствону кеси къоркъуусузлукъ бёлюмюню полициячыларына жол-патруль службаны инспектору наркотиклени законсуз сатыу-алыугъа къатышханыны юсюнден белгили болгъанды. Аны бла байламлы оператив-тинтиу ишле башланнгандыла. Право низамны сакълаучу наркотиклени излегенча этип, ишеклиден 0,64 грамм ууну сатып алгъанды. Инспекторну эмда аны машинасын тинтгенде, энтта чулгъамла табылгъандыла. Аланы битеулю ауурлугъу 1,85 граммгъа жетеди.

Бу бузукълукъ бла байламлы РФ-ни СК-сыны КъМР-де  следствие управлениясыны келечилери инспекторгъа РФ-ни УК-сыны 228-чи статьясыны 1-чи кесегине эмда 228.1-чи статьсыны 3-чю кесегини «б» пунктуна кёре терслеу материалла ачхандыла. Ол наркотиклени законсуз сатып алгъаны, асырагъаны эмда кёп санда психотроп затланы жарашдыргъаны бла сатханы ючюн жууапха тартыллыкъды.

Следовательле шагъатланы жыйышдырыу жаны бла мадарланы толтурадыла.

Мурдарлыкъгъа кирирге аздан къалгъанды

Жууапха  тартыу учрежденияладан бирини келечиси биргесине ишлегенни кёрюп болмай, аны ёлтюрюрге умут этеди. Ол къуллугъу бла хайырланып,   тутулуп тургъанладан бирине аны ёлтюрюуню къураргъа тилейди. Аны ючюн а инсаннга болжалдан алгъа эркин болургъа себеплик этерге айтады, аны саулугъу осал болгъаны бла байламлы.

Алай бла ишекли умутун толтурур мурат бла биргесине ишлегенни суратын, ол къайда жашагъаныны бла къаллай машинада жюрюгенини юслеринден шартланы белгили этеди. Алай тутулгъан мурдарлыкъны этерге унамай, хазырланнган аманлыкъны юсюнден право низамны сакълаучулагъа билдиргенди. Полициячыла андан ары ишни къолгъа  алгъандыла. Ишекли ахчаны бергенин эм ишчи нёгерин ёлтюрюуню амалын сайлагъанын эсепге алыннгандыла.

Уголовный иш сюдню къараууна берилгенди, деп билдиргендиле бизге РФ-ни СК-сыны КъМР-де следствие управлениясындан.

Тикаланы Фатима хазырлагъанды.
Поделиться: