Умутландыргъан гёжефде – кезиулю хорлам

Калининградны «АВТОТОР-Арена» саулукъ-кючлеу арасында единоборстволадан биринчи битеукъырал фестиваль къуралгъанды. Анга къыркъдан аслам региондан 18 жыллары толмагъан 450 гёжеф къатышхандыла.

Фестиваль единоборстволаны беш тюрлюсюнден бардырылгъанды: дзюдо, самбо, эркин эм грек-рим тутушуула, шёндюгюлю панкратион, хорлагъанлагъа уа саугъа фонд да хазырланнганды. 

Анда грек-рим тутушуудан эришиулеге Элбрус районну Байзуллаланы  Юсюпню атын жюрютген олимпиада резервли спорт школундан Ёзденланы Заурбек къатышханды, бюгюнлюкде эм жетишимли, умутландыргъан да жаш спортчулабызданды. Мында да Заурбек усталыгъын, кючюн да толу ачыкълагъанды – тёрт тюбешиуюн да хорлам бла бошап, алтын майдалны къытханды. Аны Россейни сыйлы тренери Локияланы Юрий ба тренер Балаланы Алим юйретедиле.