Электрокючню къоркъуусузлугъуну жорукъларын ангылатадыла

«Россети Шимал Кавказ» компанияны бёлюмюню – «Каббалкэнергону» специалистлери «Нальчикде» «Тейри къылыч» сабий реабилитация арада болгъандыла. Энергетикле школчулагъа электрокючню къоркъуусуз хайырланыуну жорукъларыны юсюнден хапарлагъандыла.

Къонакъла сабийлеге электрокюч приборланы хайырланыуну юсюнден оюн халда кёп зат айтхандыла, ток бла ишлеген объектлени къатларында кеслерин къалай жюрютюрге кереклисин да ангылатхандыла. Аллай тийреледе къоркъуу болгъаныны юсюнден къаллай билдириуле орнатылыучусун да кёргюзтгендиле.

Сабийле токну юсюнден не зат билгенлерин викторинада ачыкълагъандыла. Энергетикле алагъа дагъыда жаралы болгъан адамгъа биринчи медицина болушлукъну къалай берирге кереклисин кёргюзтгендиле.

Дерсде айтылгъан эмда кёргюзтюлген хар неге да сабийле уллу эс буруп тынгылагъандыла. Специалистле бла бирге «Гоша» деген тренажёрну юсюнде ток ургъан адамгъа къалай болушургъа боллугъун да кеси кёзлери бла кёргендиле.

«Тейри къылычда» жыл сайын 3,5 минг сабий солуп кетеди. Энергетикле анда хар жангы смен бла тюбеширге, адамны жашаууна терен сингнген электрокючню хайырыны бла хатасыны юсюнден толу хапар билдирирге кюрешедиле.

Улбашланы Мурат хазырлагъанды.
Поделиться: