Къурулушланы бардыргъанлагъа соруула чыкъгъандыла

Озгъан ыйыкъда Тюркде бла Сирияда  жер тепгени  бла байламлы кёп шартла ачыкъланадыла.   Толусунлай оюлгъан мекямланы ишлеген компаниялагъа бла инженерлеге соруула  чыкъгъандыла. Аладан бир къауумун тыш къыраллагъа учаргъа тебирей тургъанлай  аэропортлада  тутхандыла.

Алай  Тюркню жашау журт управлениясы ишлеген объектледен бири да оюлмагъанын чертирчады. Он провинцияда не межгитле, не кёп къатлы мекямладан бири да тепмегендиле, бузулмагъандыла.  Неджметтин Эрбакан атлы университетни инженер факультетини таматасы, къарачайлы жаш Къоркъмаз Хасан белгилегеннге кёре, битеу ол къурулушла жер тебиуню кезиуюнде бир тюрлю хата болмазча  амалла  бла  бардырылгъан  эдиле.  Аланы мурдорлары тоннель халда салыннгандыла. Бетонну бла темирлени хайырланып ишленнген мекямны къабыргъалары бир кесек жарылыргъа, кирпичлери да къобаргъа боллукъдул,  алай  ол мекямла саулай  бир заманда да оюллукъ тюйюлдюле.