Барыбыз да билгенден,Россейни Президенти Владимир Путинни башламчылыгъы бла 2023 жыл Устазны бла насийхатчыны жылыча белгиленеди. Ол да бошдан тюйюлдю. Хар адамны да къадарында устаз энчи магъананы тутады. Билимни дуниясына эшиклени ачхан биринчи устаз а – бютюнда. Аны бла байламлы биринчи устазыгъыз жюрегигизде не ыз къойгъанды, деген сорууну къауум адамгъа бергенбиз, аланы жууаплары бла сизни да шагъырей этерге сюебиз.
Гайыланы Лейля:
- Герпегежни школуна 1984 жылда баргъанма. Биринчи устазым Бёзюланы Фазилят Абдуллаевна болгъанды. Бизге дери да ол 10 жылдан артыкъ заманны ишлеген эди. Эсимде артыкъда аны чынтты тиширыу сыфаты сакъланнганды. Окъутханы бла бирге, ол бизни адеп-къылыкъгъа да юйрете эди. Сёз ючюн, ашханагъа барсакъ, биргебизге келип, стол артында кесин къалай жюрютюрге керек болгъанын айта эди. Бир жол а дерследен сора юйге тебирейбиз, жауун а къыстау жауа. Салкъынлыгъы уа жаланда Фазилят Абдуллаевнаны бар эди. Бизни къоюп кетмей, ол, къайдан эсе да уллу целлофан табып, барыбызны да аны тюбюне жыйып, юйлерибизге ашыргъан эди. Ол а аны адамлыгъыны санап саны болмагъан шартладан бириди.
Биз школну бошагъанлы 30 жыл чакълы болады. Фазилят Абдуллаевна уа шёндю да Герпегежни орта школунда ишлеп турады. Ма аллай адамладыла окъуу юйлени тутурукълары.
Таппасханланы
Аминат:
- Гелястанланы Зариф Идрисовични классына тюшюрюр ючюн мени бир жыл кеч берген эдиле школгъа. Ол Яникойда мектепни башланнган классларыны устазларыны араларында бек кючлюге саналгъанды. Башха класслада сабийлени санлары 25 чакълы болса, аныкъында уа 40-гъа жетиучю эди. Ма бизни классда да 42 окъуучу бар эди.
Аны хайырындан бюгюнлюкде да школ тенглерибиз бла къаты байламлыкъ жюрютгенлей турабыз. Зариф Идрисович окъууубузгъа, миллетибизни маданиятына бла тарыхына сакъ болургъа юйретгенди, аны акъылыбызгъа сингдиргенди. Жарсыугъа, ол дуниясын алышханды, алай биз аны насийхат сезлерин терк-терк эсгеребиз. Школ жашауну, устазыбызны да жаланда иги бла эсибизге тюшюребиз.
Къалабекланы Азамат:
-Булунгуда биринчи классха 2003 жылда баргъанымда, Жарашууланы Зитагъа тюшген эдим. Кёргенимлей окъуна жаратхан эдим биринчи устазымы. Школгъа аны къолундан тутуп барыр ючюн, аланы орам бла жюрюучю эдим. Шёндю да анга хурметим уллуду.
Черкесланы Лейля:
Хасанияны 16-чы номерли школунда окъугъанма. Биринчи устазым Бегийланы Евдокия Адрахмановна эди. Биринчи классха келгенимде, абызырап эдим – танымагъан тенглерим, устазла, дерсле… Алай Евдокия Адрахмановнаны ариу ышаргъаны, жумушакъ ауазы жюрегими шошайтхан эдиле. Ол бизни кёп затха юйретгенди. Абадан класслада биз апчымазча тынгылы хазырлагъанды бизни, окъургъа итиндиргенди. Андан сора да, шуёх болургъа, тенгликни жюрютюрге, бир бирибизге таянчакълыкъ этерге да юйретгенди. Ол затла бизге жашауда кёп кере болушхандыла.
Гузиланы Илияс:
- Ташлы-Талада биринчи устазым Уазыкланы Галина Ибрагимовна болгъанды. Ол анамы, тамата кьарындашымы да окъутханды. Тюзлюкге, тазалыкъгъа энчи эс бургъанды, окъуучуланы да анга юйретирге кюрешгенди. Хар сабийге кесича келишим табып, ауазын кётюрмей, бир халда, хар дерс да эсингде къалырча эталгъанды. Эсимдеди, сегизинчи мартха анама акъ кисейни юсюнде ийне гюлчюкле тикдиргени. Ол саугъаны анам бюгюн да асырагъанлай турады.
Галина Ибрагимовна школда тюрлю-тюрлю байрамлагъа бусагъатда да сюйюп къатышады. Аны кёп махтау къагъытлары, саугъалары да бардыла. Кёп жашха бла къызгъа къыйын салгъанды, билим бергенди. Ол окъутханланы араларында аны ызын тутханла да асламдыла.
