«Окъуучуларым адамлыкъ даражаны бийикде тутханла болсала сюеме»

Хачаланы Светлананы биринчи кере Нальчикни 9-чу номерли  гимназиясында «Жылны устазы - 2019» конкурсда кёргенме. Ол 10-чу класслада  дерсле  бардыргъанды. Андан сора  школчула  аланы Светлана Эльдаровна 
окъутса сюйгенлерин айтхандыла. Конкурс ишинде  жангы амалланы не къадар толу хайырланыргъа кюрешгенди.  Шёндюгю жаш адамлагъа уа ол бютюн бек керекди эмда сейирди. 

Светлана Эльдаровна Нальчикни 32-чи номерли орта школунда орус тилден бла литературадан кёп заманны окъутуп тургъанды. «Ол бизге келген биринчи кюнлеринден окъуна ариу къылыгъы, окъуучуланы эслерин дерсге  бура,  предметни сюйдюре билиую бла сейирсиндиргенди. Грамматика тынч предметледен тюйюлдю, алай бу назик тиширыу аны сабийлеге сюйдюргенди. Ол школчуну оюмуна эс бурады, аны эшите да биледи. Къаллай болумда да ачыуланмай, къычырмай, кесин сабыр жюрютгенин жаратама. Тёзген а тынч тюйюлдю бир-бир кезиуледе», – дегенди  математикадан устаз Валерий Григорьевич Ревелис.

2012 жылда аны, жаш специалистнича,  беш жылдан а сынаулу педагогнуча, «Жылны устазы» деген конкурслагъа къатышырын, окъуу юйню намысын къорууларын ышанадыла. Биринчисинде хорлагъанды, экинчисинде уа экинчи жерге  тийишли болгъанды. 

– Къаллай конкурс да усталыгъынгы кётюрюрге себеплик этгени бла магъаналыды. Ол устазгъа экзамен кибикди,  хар жанын да туура этерге болушады. Башхаланы юлгюлерин, сынауларын кёре, ахшы амаллагъа юйрене, кесинг билгенден да  юлюш эте турмасанг, ёсерик тюйюлсе, – дейди Светлана Эльдаровна.

Ол аскерчини юйюрюнде туугъанды. Аны себепли  ата-анасы бла  бир жерден башхасына кёп кере кёчерге тюшгенди. Ол Москвада да жашагъанды, Нальчикде 2-чи лицейде билим алып чыкъгъанды. Бу окъуу юйню аны  атасы да алтын майдалгъа  бошагъанды. 

Гитчелигинден окъуна юрист болургъа сюйген къыз  лицейде ол жаны бла теренирек билим берген классда окъугъанды. Аланы ол заманда КъМКъУ-ну профессорлары окъутхандыла. Ол санда Башийланы Къонакъбийни къызы

Светлана да. Ма ол, къызны хунерлигин  кёрюп, бизни университетге кир, филолог бол, деген эди.  Тёртюнчю курсда уа Хачалагъа келин болады, университетни бошаргъа  къызчыкъ да табады, аны ызындан дагъыда эки бала къошуладыла.   

– Анам оруслу, атам а къабартылы болгъанлары себепли, Акъ-Суугъа  келгенимде, къайын анам: «Къызым, мен орусча  билмейме, къыйналсанг да, тауча сёлеширге юйрен», – деп, сёзню чорт салгъан эди. Баш иенги, аны жууукъларын сюйсенг, тилин, адетин да терк билесе, бютюнда сабий туугъандан сора. Алайды да, тауча юйреннген къыйын тюйюл эди манга, – деп ышарады Светлана.      

Аны бетинде, кёз къарамында да кёзбаулукъ, алдаулукъ жокъдула. Ачыкъ адам. Энди аны урунуу стажы онбеш жылдан атлагъанды. Шёндюледе  шахарда жангы 33-чю номерли мектепге кёчгенди. Ишине чыгъармачы кёзден къарагъаны, кёпден-кёп билирге итиннгени, окъуучулары замандан артха къалмазларына къайгъыргъаны, билим бериуде не къыйматлы амал бар эсе да, аны хайырланыргъа кюрешгени бла ол не заманда да коллегаларындан, школчуладан да хурмет тапханды. 

Педагогика ишде  сабийлени адеп-къылыкъгъа юйретиуню да магъаналыгъа санайды. «Сабийлени къылыкълары кёп тюрлюдю. Аланы атлары башхача, къалгъан затлары  да бир бирге ушамайдыла. Бири билим алыргъа ёч эсе, башхасы шуёх байламлыкълагъа аслам магъана береди, ючюнчюлеринде уа чыгъармачы хунерлик барды. Хар бирини  да къылыкъларын, онгларын уста билеме. Жюреклерине жол табаргъа кюрешеме. Бек башы уа – кёзбаусуз, ётюрюксюз, адамлыкъ даражаны бийикде тутхан инсанла болуп ёсселе сюеме, аны ючюн къолумдан келгенни аямайма. Сора салгъан къыйынынг зырафына кетмегенин кёрсенг, ол бек уллу  насыпды», -дейди устаз.

«Баш ием, сабийле да манга билеклик этедиле», – дейди. Бош заманында уа ол  тюрсюнлю халыланы, ийнени да къолуна алып,  сурат ишлейди. «Бу мени бек сюйген жумушумду, жарсыугъа, анга заманым кёп къалмайды», – дейди ол.

Холаланы Марзият.
Поделиться: