Багушну тёкгенлеге жууаплылыкъ къатыланнганды

Машинадан,  мотоциклден кир-кипчикни жолгъа атып къояргъа сюйгенле сакъ болургъа керекдиле. Багушну эркин этилмеген жерде атханлагъа жууаплылыкъ  къатыланнганды.

Ол жаны бла тюзетиуле РФ-ни Административ бузукълукъланы кодексини 8.2-чи статьясына   къабыл кёрюлгендиле.   Кир-кипчикни машинадан эркин этилмеген жерге атханы ючюн инсаннга 10-15 минг сом тазир тёлерге тюшерикди. Энчи предпринимательге жууаплылыкъ андан да къатыды – 20-30 минг сом. Организация уа – 30-50 минг сом тёлерикди.

Бузукълукъну къайтарып этгеннге ахчаны ёлчеми эки кереге кёбейтиледи.

Багушну ауур жюклю машинадан, прицепден тёкгенлеге уа тазир бютюнда уллуду. Инсан 40-50 минг сомун, жууаплы къуллукъчула 60-80 минг сомун, организация уа 100-120 минг сомун тас этерге хазырлансынла. Жууаплы къуллукъчуланы бла организацияланы машиналары сыйырылыргъа да боллукъдула.

Тикаланы Фатима хазырлагъанды.
Поделиться: