Хар сурат – керти болумну шагъаты

Республиканы Жаш тёлюню ишлери жаны бла министерствосуну эмда КъМР-ни прокуратурасыны себепликлери  бла «Российская газетаны»   аскер сурат алыучу корреспонденти Владимир Аносовну «Донбасс-2022» деген кёрмючю къуралгъанды. Ол 28 январьгъа дери ишлерикди эмда  Тырныауузда  Къулийланы Къайсын атлы Маданият юйде бла Майскийде тарых-краеведение музейде  кёргюзтюллюкдю.

Нальчикде уа кёрмюч В.М.Коков атлы Къырал аграр университетде ачылгъанды. Анга къараргъа студентле, преподавательле, окъуучула да кёп санда келгендиле. Аланы КъМР-ни Правительствосуну Председателини орунбасары Марат Хубиев алгъышлагъанды. «Бу кёрмюч  энчи аскер операция баргъан жерде халны керти суратлайды», – деп, ол авторгъа жюрек ыразылыгъын билдиргенди.

Республиканы прокурору Николай Хабаров да Владимир Аносовха ыспас этгенди.  «Сау болсун  бизге быллай суратланы келтиргени ючюн. Алагъа къарап, кёп затны кеси кёзю бла кёрген адамдан халны тюзюн билирге онг табабыз. Ол а бек багъалыды эмда ёсюп келген жаш тёлюню патриот ниетде юйретиуге да уллу къошумчулукъду», – дегенди.

Кёрмючню бу бийик окъуу юйде ачаргъа дегенлери ючюн ыспас сёзюн аны ректору  Аслан Апажев да айтханды. КъМР-де жаш тёлюню ишлери жаны бла министр Азамат Люев а сурат кёрмючню авторуна республиканы оноучуларыны атындан бюсюреу письмону  бергенди.

«Российская газетаны» обозреватели Никита Пешков а былай айтханды: «Отставкадагъы майор, краснодарчы аскер фотокорреспондент Владимир Аносов Къобанда фермерлени, Сочиде  Олимпиада объектлени суратха ала туруп, кюнлени биринде къазауат баргъан жерге тюшеригин биле болурму эди? Алай а аскер журналист къазауат баргъан, адамларыбыз  къыйналгъан, апчыгъан жерледе  болургъа керекди. Бюгюнлюкде андан магъаналы  иш жокъду. 

Былайда журналистлени жюрютген машинаны водителини айтханын юлгюге келтирирге сюеме: «Донецкде топ-окъ аямай атыла тургъан кезиуде, хар ким да жерге аугъанларында, Владимир Алексеевич, узакъ болмай топла  атылгъанларына, тёгерекни къара тютюн басханына  да къарамай, сюелип, сурат алдырып тургъанды. Бек башы уа - энчи аскер операция баргъан жерге кеси ыразылыгъы бла  тебирегенди».

Владимир Аносов да келгенлеге ыразылыгъын билдирип, кёрмючде суратланы юслеринден хапар айтханды.

Ол кюн ыразылыгъы болгъанла вузну  аудиторияларындан биринде мастер-классха да къатышхандыла.

Эсгертиу: биринчи кере бу кёрмюч 2022 жылны июнь айында Москвада «Российская газетаны» редакциясында, ызы бла  Краснодарда ачылгъанды, сентябрьде уа Сочи шахарда  Шёндюгюлю журналистиканы «Вся Россия-2022» деген форумунда андагъы  къырал университетде да къуралгъанды, Октябрь айда уа кёрмюч Север запад федерал округда жолоучулугъун башлагъанды: Санкт- Петербургда Журналистлени юйюнде эмда  Б.Н.Ельцин атлы Президент китапханада, декабрь айны биринчи кюнлеринде уа Великий Новгородда, ызы бла Нижегород областьны Дзержинский шахарында да болгъанды. Декабрь айда дагъыда Оренбургда бла Самарада, Калининград областьны Светлогорск  курорт шахарында да  ачылгъанды.

Кёрмючде аскер корреспондентни Мариупольда, Донецкде, Волновахда, Лисичанскде бла Луганскда арт айлада  алдыргъан суратларын кёрюрге боллукъду. Ол фронтда корреспондентлени харкюнлюк ишлерин, энчи аскер операцияны барыу халын – россейли аскерчилени суратларын, аскер техниканы, украинлы миллетчиле къоюп кетген  жерлени, эркин этилген шахарлада мамыр жашаугъа  къайта башлагъан адамланы,  къазауат баргъан тийреледе сабийлени  да суратха алдыргъанды. Хар кадрда Донбассны эм жангы тарыхы кёргюзтюледи.   

Владимир Аносов кёп жылланы  аскерде къуллукъ этгенди, запасдагъы майорду. Журналистикагъа уа Сауутланнган  Кючледен кетгенинден сора келгенди.  Къобан къырал университетни журналистика факультетин, магистратураны да айырмалы бошагъанды. Краснодар крайда «Российская газетаны» филиалыны  сурат алдырыучу корреспондентиди. 2008 жылда Цхинвалда ишлегенди, 2015 жылда аскер корреспондентча Донбассха да баргъанды, 2022 жылны март айындан бери уа  энчи аскер операцияны барыу халын суратха алдырады.