Сабийлик муратларына элтген ышаннгылы атламла

Къайсы миллетни да  тамблагъы кюню – ол аны бюгюннгю жаш тёлюсюдю. Бусагъатда жер-жерледе окъуп, билим ала, аслам тюрлю усталыкъны  жашырынлыкъларына тюшюне тургъан  жашларыбыз бла къызларыбыз ёз халкълары бла бирге къыралны айныууна, жамауатны тамблагъы кюню ышаннгылы, ырахатлы да болуруна къошумчулукъ этерикдиле.

Насыпха, миллетибизде окъуугъа, билимге итиннген жаш адамларыбыз аз тюйюлдюле. Ала школда, вузда, колледжде  неда бирси окъуу юйледе устазлары, преподавательлери, бек алгъа уа ата-аналары, аппа-ынналары юйретген жол бла бара, тенглерини арасында юлгюлю боладыла.

Гелястанланы Ибрагим бюгюнлюкде Къабарты-Малкъар къырал университетни медицина факультетини багъыу иш бёлюмюню тёртюнчю курсунда окъуй турады. Врач усталыкъны уа ол сабийликден да жаратып, саусузлагъа ауруулары бла байламлы эс тапдырыр жолну ол себепден сайлагъанды. Аны  алайлыгъына уа  коронавирус жукъгъан ауруу эм алгъа жайылып, жамауат бютюн апчыгъан кезиуде эки нёгери бла бирге  ковидден  къыйналып, юйде туруп багъылгъанлагъа керекли затларын ташып тургъаны да шагъатлыкъ этеди.

Алыкъа биринчи курсха жюрюген студентге ол жумушну эт деп буюргъан, эсгертген да болмагъанды. Ауругъанланы юйлерине аш-сууну, дарманланы да ол кесни ыразылыгъы, жюрек чакъырыуу бла элтгенди. Болушлукъ кереклилени уа соруп-сурап билгенди. Жашланы  бу жумуш бла кюрешгенлерин факультетни деканы Ачабайланы Айшат Борисовна билгенинден сора уа, аланы вузну волонтёрлары болгъанларына шагъатлыкъ этген къагъытла бла саугъалагъандыла. Андан бери да Ибрагим бу жумуш бла  кюрешгенлей, окъуу юйню жамауат ишине да тири къатышханлай келеди. Аны ол ышанын а дагъыда бир саугъасы – факультетни жашаууна тири къатышханы ючюн грамотасы ачыкълайды.

Огъарыда аны ковидден ауругъанлагъа къайгъырыулугъуну юсюнден сагъыннганбыз. Ол жангы къоркъуулу инфекцияны экинчи толкъунунда Нарткъаланы больницасыны мурдорунда къуралгъан госпитальда ишлерге да арсарсыз баргъанды. Инжилгенлени, жарсыугъа, дунияларын алышханланы, ёлюмню бла жашауну арасында тургъанланы кёргенди. Андан бери жашауну  башха тюрлю сезерге юйреннгенин, аслам затха кёз къарамы ёзгергенин да жашырмайды. Коронавирус кесине да госпитальдагъылагъа болушхан кезиуюнде жугъуп, ауругъан да этгенди.

Медицинаны сайлап, аны бла бирге илму бла да жетишимли кюрешгенлерибизге не заманда да хурметибиз уллуду. Гелястан улу да кесини усталыкъ бла байламлы жолун бу халда бардырыргъа излегенин белгилерге тийишлиди. Ол врач жаланда саусузлагъа болушлукъ этгени бла чекленип къалмай, ишинде эслеген, ачыкълагъан сейир затларын, кесини сынамын къагъытха да тюшюрюуню тюзге санайды.

Студент жашны илму бла кюрешгенине дагъыда къайтсакъ, бу жумушну ол Нальчикни биринчи номерли гимназиясында окъугъан кезиуюнде окъуна  къолгъа алгъанды. Устазы Къонакъланы  Любовь Аскербиевнаны башчылыгъында малкъарлыланы жашау турмушларыны, аш-сууларыны,  къонакъбайлыкъларыны юслеринден да иш жазып, Москвада бардырылгъан Окъуучуланы халкъла аралы тинтиу-излем конкурсларына къатышханды. Сегизинчи классха жюрюген Ибрагим къыралыбызны  ара шахарындан аллай даражалы эришиуден биринчи жерни алып, диплом, майдал бла да саугъаланнганды.

Бюгюнлюкде уа ол онтёрт тынгылы илму ишни авторуду. Аны статьялары «Скопус» илму базагъа, ВАК-ны эмда РИНЦ-ни тизмелерине кийирилгенлерин белгилерчады.

Гелястан улу уа бусагъатда бютюнда къыйматлы тема – коронавирусдан ауруп бошагъандан сора адамны саулугъун игилендириу  не халда болургъа тийишлиси бла кюрешеди. Таза хауа, витаминле, агъач тийрелеринде неда паркда солуу эмда жюрюу, тенгиз, табийгъат, жарыкъ сагъышла – ала барысы да  бу къыйын инфекциядан къутулгъанлагъа артда къарыуларын жыяргъа иги да жарагъанларын белгилейди.

Андан сора да, ол бизни окъуу юйюбюз Ставропольдагъы къырал медицина университет бла биригип, жаланда бешле алып окъугъан студентлеге къатышыргъа эркинлик берилген илму конференциялагъа хар айдан къатышханлай турады. Анга илму иш бла кюреширге жол кёргюзтген эмда аслам затха тюшюндюрген преподавательлери Фатима Валерьевна Шаваевагъа (медицина факультетни деканыны орунбасары), Ирина Карнеевна Тхабисимова (битеулю врач хазырлыкъ эмда медицина реабилитация кафедраны башчысы), Ачабайланы Айшат Борисовна, Лаура Залимгериевна Шауцуковагъа (саулукълу эмда патологиялы физиология кафедраны доценти) да ыразылыгъын билдиреди. Ала ангылауларын бир студентден да аямагъанларын, окъургъа-билирге сюйген а тышына кетмесе да, кесибизни вузубузда даражалы, белгили преподавательлерибиз барлыкъларын, аланы сынамларындан да  кёп затха юйренирге боллугъун айтады.

Айхай да, Ибрагимни бош заманы алай кёп къалмайды. Дерслеринден тышында ол асламысында илму жангычылыкъла, инсанны бир магъаналы, сейир да затха тюшюндюрлюк литературагъа эс бурады. Женгил биркюнлюк чыгъармалагъа заманын тас этерге сюймейди. Театрны,  музыканы да жаратады.

Дагъыда ол назмула жазады. Ингилиз, тюрк тиллеге профессионала даражада юйренеди. Бюгюнлюкде  ол ышан – тыш къыраллы тиллени билиу – жашауда кереклисин чертеди. Ол ана тилинде шатык сёлешгенин да белгилерге, аны юйретгенлеге да ыспас этерге тийишлиди.

Ушагъыбызны кезиуюнде бюгюннгю жигитибиз Бабугент элде  жамауат арасында сыйлары-намыслары жюрюген Туменланы Ибрагим (жаннетли болсун) бла Бёзюланы Сакинатны туудукълары болгъанын да билгенбиз. Айхай да, туугъан элимде аллай хурметли адамланы, ала уллу юйюрню халал къыйынлары бла ёсдюрюп, юлгюлю болуп жашагъанларын билгеним себепли, Ибрагим аллай аппасыны-ыннасыны юйретиулерине таянып ёсе,  аллай ариу жол бла барлыгъына аз да ишеклик жокъду.

Ол дагъыда атасыны анасы Гелястанланы (Созайланы) Шахарыуну ариу сёзле бла эсгереди. Сабийлиги аны къатында озгъанын айта,  халкъыбызда аппала-ыннала не ишден да артха турмай, жаш тёлюню чыныгъыргъа юйретгенлерин тюзге санайды.

Кертиди, Ибрагим алыкъа студент эсе да, аны усталыгъына кёз къарамы, окъууунда, илму жаны бла да этген жетишимлери тамблагъы кюнде белгили врачларыбызгъа дагъыда къошулур деген умутубузну кючлейди. Ол окъууун, хунерин ёсдюрюрге, сынам жыйышдырыргъа тыш жерлеге окъуна барса да, алгъан билимин кесибизде хайырланыр акъылдады. Аны не жаны бла да кёллендиргенлей тургъан анасы Туменланы Маржаннга да ыразылыгъын билдиреди.

Мокъаланы Зухура.
Поделиться: