Окъууларына, саулукъларына да бирча къайгъыра

14 января, 2023 - 14:00
Кёнделенни  4-чю номерли школу ачылгъанлы  бу кюнледе 16 жыл толады.  2014 жылдан башлаб а мында  «Доступная среда» деген программа  хайырлы ишлейди.  Анда саулукълары бла байламлы тыйгъычлары болгъан сабийлеге деп комплексли жумушла тамамланадыла. Аланы хайырындан сакъатлыкълары болгъан жашчыкъланы  бла къызчыкъланы саулукъларын кючлендириу мадарла  этиледиле. Андан сора да, алагъа къошакъ билим бериуге да аслам эс бёлюнеди.  Кружоклада сабийлени не жаны бла да хунерлерин ачыкълар онглары бардыла.
Шёндю школгъа аллай 16 сабий жюрюйдюле.
– Сакъат сабийле кеслерин школда башхаладан кем сунмаз ючюн, кёп амалла бардыла.  Сёз ючюн,  энчи окъутуу программала къуралыпдыла. Осал  кёргенлеге  энчи аппарат барды. Бармакъларын,  къолларын ишлетирча  программаланы  хайырланабыз. Классда дагъыда интерактив къанга, Интернет  да бардыла, – дегенди школну директору Атмырзаланы Мухтар. 
Классладан тышында да  юч солуу отоу барды. Биринчисинде арыгъан заманларында солургъа боладыла. Экинчисинде  психологла сабийле бла  ушакъла бардырадыла, жарсыуларына тынгылайдыла. Ючюнчюсю уа спорт бла кюреширчады. Ол битеу керекли спорт интвентарь бла жалчытылыныпды. Ары сабийле сюйюп жюрюйдюле. 
Башда чертгенибизча, специалистле ала бла энчи программагъа кёре кюрешедиле. Аланы бир къауумуну школгъа хар кюнден келир амаллары барды, башхалары уа юйден билим аладыла. Аланы ыйыкъгъа бир-эки кере школгъа келтирип,   къалгъан сабийле бла бирге   болургъа онг бередиле. 
Заманны излемлерине кёре, окъуу учреждение сабийлени усталыкъ  сайлауларына да   аслам эс бёледи.  Алай бла, школ программадан сора да, анда окъугъанлагъа къошакъ билим бериу   аланы сейирлерине кёре къуралгъанды. Тогъузунчу классда анга энчи магъана бериледи. Алай бла школда «Точка роста» ишлеп башлагъанлы юч жыл болады. Ол юч ыз  бла айныйды: техника, суратлау эм физкультура- спорт. Мында сабийле 3D принтер бла ишлерге юйренедиле,  шахматла бла да тири кюрешедиле. 
– Жангы дерслеге бек сюйюп къатышадыла, 3D принтер, робототехника эм башха технология амалланы да билирге бек уллу итиниулери барды, - дейди школну таматасы.
Мында сабийлени аш-суу бла жалчытыугъа да аслам эс бёледиле. Алай бла окъуучуланы  кюннге эки кере ауузланыр онглары барды. Школну ашханасыны тамата повары Ёзденланы Фаризат айтханнга кёре, азыкъла ГОСТ излемлеге кёре жарашдырыладыла.
– Школчула барысы да сюйюп ашарча, тюрлю-тюрлю ашла этерге кюрешебиз, - дейди ол. 
Бу школну ичинде сабий сад да орналады. Бери 2-жыллыкъ сабийледен башлап 7  жылларына дери жюрюйдюле -битеу да жюзден артыкъ сабий. 
– Школгъа хазырлауда бизни бёлюмню магъанасы уллуду. Балаланы саулукъларына  энчи эс бурабыз. Ансыз сабий школда тынгылы окъуялмайды. Битеу окъуучуларыбыз  кеслерини жыл санларына кёре иги айныпдыла. Ол бизни бек къууандырады, - дегенди ушагъыбызны кезиуюнде билим берген бёлюмню тамата юйретиучюсю Бечелланы Люба. 
Школ да, сабий сад да сейир жашау бардырадыла. Сабийле спорт эришиулеге, дерс олимпиадалагъа да  тири къатышадыла. Мындан окъуп кетген жаш тёлю республика бла чекленип къалмай,  Россейни даражалы окъуу юйлеринде усталыкъла аладыла.  
 
Холамханланы Алима.
  • 18 просмотров
Поделиться: