Специалистле магъаналы сорууланы сюзгендиле

Россейни МВД-сыны Нальчикде Управлениясында акъылбалыкъ болмагъанланы ишлери жаны бла алчы специалистле бла тюбешиу болгъанды. 

Жыйылыугъа къатышханла ишлерини эсеплерин чыгъаргъандыла эм андан ары къаллай жумушла болгъанларын белгилеп, аланы бардырыуну амалларын сюзгендиле.

Бу ишге МВД-ны Нальчикде Управлениясыны башчысы, полицияны полковниги Хачим Шебзухов, полицияны подполковниги Жантууланы Залим, Управленияны энчи составыны иш жаны бла бёлюмюню таматасы Ислам Заракушев, акъылбалыкъ болмагъанланы ишлери жаны бла бёлюмню башчысы полиицияны подполковниги Марита Шорова къатышхандыла.

Управленияны башчысы Х. Шебзухов сабийлени араларында аманлыкъчы ишлени профилактикасын бардырыуну тийишли даражада ётдюргенлери ючюн жыйылгъанлагъа ыразылыгъын билдиргенди. Энчи ол акъылбалыкъ болмагъанланы ишлерине профилактика этиу жаны бла бёлюмню таматасы эм жандауурлукъ бла кюрешип къыйын жашау болумлагъа тюшгенлеге болушлукъ тапдыргъан Амина Бадраковагъа, Нальчик шахарны администрациясыны специалисти Курданланы Людмилагъа. Сабий эм Жаш тёлю чыгъармачылыкъны дворецини психология службасыны таматасы Валерий Апажевха ыспас этгенди. 

Тюбешиуде жангы жылда энчи эс жаш адамла аманлыкъчылыкъны жолуна турмазча этиуню баш борчха салыргъа тохташдыргъандыла. Специалистлени оюмларына кёре, билим бериу учрежденияланы коллективлери инспекторла бла байламлыкъланы кючлерге итинирге керекдиле. Бек биринчиден а, бу ишни тийишли даражада къурауну амалларын да табаргъа кюреширикдиле.

Ахырында полковник Хачим Шебзухов жыйылгъанлагъа Ыспас къагъытла саугъалап, Жангы жыл бла алгъышлап, саулукъ эм ишде жетишимлик тежегенди.