Жашауну сакъларыкъ жорукълагъа юйрете

Нальчикде бир-бир предметледен терен билим берген А. С. Пушкин атлы бешинчи номерли орта школда ТОК-ДЕРС ётгенди. Аны бла «Россети Шимал Кавказ» компанияны Къабарты-Малкъарда бёлюмю жангы коммуникациялы проектини биринчи атламын этгенди.

Энергетикле бла тюбешиуге сегизинчи классланы 150 чакълы окъуучусу келген эди. Сёз а анда электрокючню хайырланыуда къоркъуусузлукъну юсюнден баргъанды. Сабийле, энергетикле бла бирге токну къоркъуусузлу эмда ышаннгылы шуёх къалай этерге боллугъуну юсюнден ушакъ бардыргъандыла. Компанияны келечилерине бу ишде «Барындан да иги» деген музыка шоуда хорлагъан къызчыкъ Виктория Лещинская болушханды.

Виктория электрокюч аны жашауунда къаллай магъананы тутханыны юсюнден хапарлагъанды. Ол юйюнде, школунда, репетициялада, жараулада эмда сахнада аны къатында болгъанын белгилегенди. Аллай бир-бир жерледе къадар оборудование турады, къатларында уа ток чыбыкъла. Къызчыкъ аллай жерледе кесин сакъ жюрютюрге юйреннгенин айтханды.

«Каббалкэнерго» предприятияда урунууну къоруулау жаны бла специалист Надежда Целуйко, Прохладна районда электросетьни келечилери бла бирге, школчулагъа тийишли жорукъланы юсюнден айтхандыла. Юзюлюп жерге тюшюп тургъан ток чыбыкълагъа тиерге эмда электрокюч объектлени къатларында ойнаргъа жарамагъанын, сора дагъыда экинчилерини къатларында орнатылгъан эсгертиуле нени юсюнден билдиргенлерин туура этгендиле. Виктория Лещинская уа электриклени къоруулаучу юс кийимлерин кёргюзтгенди.

Ызы бла энергетикле мастер-класс бардыргъандыла. Анда ток ургъан адамгъа биринчи болушлукъ къалай берилиучюсюн тренажёр-роботну юсюнде кёргюзтгендиле. Школчуланы уа бу жаны бла билимлери иги болгъанына ала сейир окъуна этгендиле. Аладан бир-бирлери саусузгъа къалай къараргъа кереклисин жик-жиги бла айтхандыла.

Дерсни ахырында сабийлеге викторина бардыргъандыла. Анда школчула билгенлерин кёргюзтгендиле, къоркъуусузлукъну жорукъларына бек сакъ болургъа кереклисин да ангылагъандыла. Башхаладан тирирек болгъанлагъа уа энергетикле компанияны атындан саугъала бла дипломла бергендиле.

Компания быллай дерслерин дайым бардырады. Алагъа жыл сайын эм азындан юч минг сабий къатышады.