Бир ниетлиликлерин, таукелликлерин да кёргюзтгендиле

Тюнене Нальчикде Украинаны тийресинде бардырылгъан энчи аскер операция жанлы болгъанланы  митинги  бардырылгъанды. Аны КъМР-ни Миллетлени ишлери эмда жамауат проектле жаны бла министерствосу къурагъанды. Анга республиканы Парламентини депутатлары, политика партияланы эм жамауат организацияланы келечилери къатышхандыла.

Митингни  Парламентни спикерини орунбасары Жанатайланы Салим ачханды.

– Биз бюгюн былайда энчи аскер операциягъа кесибизни кёз къарамыбызны билдирирге жыйылгъанбыз. Бу иш башланырдан алгъа, бизни къырал Минскде этилген келишимлеге кертичилей къалыргъа кёп кере чакъыргъан эди Украинаны властьларын. Анда жаланда Донбассда мамырлыкъ болсун деп,  сёз алай салыннганды. Анда жашагъанланы орус тиллеринде окъурча, сёлеширча онглары болсун деп айтылгъанды. Алай Россейни оюмун эшитирге унамагъандыла. Муратлары уа,  запад къыралла бла бир тилли болуп, бизни чекде орналгъан регионларыбызгъа чабаргъа эди.

Бизни республиканы келечилери биринчи кюнден да кеслерини биригиулюклерин кёргюзтгендиле. Мобилизацияны сакълай турмай, кеси ыразылыкълары бла  ары атланнганла да аз тюйюлдюле. Бириксек, къайсы жауну да хорларыгъыбыз хакъды, – деп чертгенди Жанатай улу.

Политика партияланы юслеринден айтханда, аланы районладагъы эм шахарладагъы бёлюмлери да къатышхандыла  бу митингге. Аланы келечилери байракълары бла ал тизгинледе туруп, къырал политикагъа ыразылыкъларын кёргюзтгендиле. 
Ызы бла уа сёз РФ-ни Коммунист партиясыны КъМР-де бёлюмюню секретары Дмитрий Кондратьевге берилгенди. Ол  жыйылгъанланы эслерин бюгюннгю болумну тамырлары Киевдеги майдандан жайылгъанларына бургъанды. Аны оюмуна кёре, тыш къыралла Украинагъа оноу этип, хар не да кеслерине тап келирча этгендиле. 

– Ала эки къыралны бир бирге юсгюртюп,  аралары осалгъа кетерча этер ючюн, къолларындан келгенни аямагъандыла.. Жарсыугъа, Украинаны власть органларында ол затны ангылагъан хазна адам жокъ эди. Ол а бюгюннгю жарсыулу болумгъа келтиргенди, – дегенди ол. 

Къарачай-малкъар жаш тёлюню айныууна  себеплик этген «Эльбрусоид» фондну Нальчикдеги бёлюмюню таматасы Аналаны Марат да  айтханды кесини оюмун.

– Биз кюрешни украинлы нацист эм бандера къауумла бла бардырабыз. Аны алайын ангыларгъа керекди. Жылла бла жыйылып тургъан сылтаула быллай къаугъа туудургъандыла. Ары кетген жашларыбызгъа уа хар инсан  да билеклик этерге хазыр болгъанын алагъа  болушлукъ жыйышдыргъаныбызда  кёргенбиз. Хар бири да юйлерине хорлам бла сау-саламат къайтсынла дерге сюеме, – дегенди  ол.

Дагъыда сёлешгенлени араларында Халкъла аралы черкесс ассоциацияны башчысы Хаути Сохроков, «Справедливая Россия» политика партияны регион бёлюмюню таматасы Владимир Кебеков эм башхала да бар эдиле. Ала  къыралыбызны  чачаргъа бла аякъ тюп этерге кишиге  да эркинлик берилмегенин  бирден чертип айтхандыла.