Партияны Халкъ программасы, къытлыкъгъа да къарамай, тамамланады

РФ-ни Къырал Думасыны депутаты Виктория Родина «Единая Россия» партияны Халкъ программасы Къабарты-Малкъарда тири бардырылгъанын айтханды. «Санкцияла бла байламлы къыйын кезиуге къарамай, программа битеу къыралда, республикада да тийишли даражада бардырылады»,-дегенди ол.

Аны айтханына кёре, бюгюнлюкде республикада 123 объект ишлетиледи неда тынгылы жангыртылады.  Жылны ахырына дери 11 объектни битдирип, хайырланыргъа берирге белгиленеди. Аланы арасында уа Прохладныйде, Нарткъалада эм Кубада школла да. Алада барысында да бирге 1785 окъуу жер къураллыкъды.

Саулукъ сакълауда къырал гарантияланы программасы быйыл 3,3 миллиард сомгъа дери кёбейтилгенин да белгилегенди депутат. Билим бериуде хакъны тёлеуню жангы системасы къуралгъанды. Бу сферада айлыкъны  кёбейтиуге миллиард сом бёлюннгенди, келир  жыл а бу жумушлагъа 1,7 миллиард сом къоратыллыкъды.

Депутатны айтханына кёре, республикалы бюджет федерал казнагъа келишдириледи. «Федерал бюджетде   социал борчланы тёлеуге ахча салыннганды. Ол санда партияны Халкъ программасын жашауда бардырыугъа да. Баш финанс документ, хар замандача, социал магъаналылай къалады»,-дегенди депутат.