КъМР-ни Башчысы «муниципал сагъатны» бардыргъанды

Къабарты-Малкъарны Башчысы Казбек Коков тёрели «муниципал сагъатны» бардыргъанды. Жыйылыугъа КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков, КъМР-ни жаш тёлюню ишлери жаны бла министри Азамат Люев, муниципал районланы эм шахар округланы администрацияларыны таматалары къатышхандыла.

Къабарты-Малкъарда бардырылгъан мобилизациягъа кёре аскерге къуллукъ этерге чакъырылгъанлагъа андан ары да болушлукъ бериуню соруулары сюзюлгендиле.

«Солуу кюнден кеч къалмай, биз мобилизациягъа чакъырылгъанла жыйылгъан жерге кезиулю продуктланы, сууну, кюн сайын керек болуп тургъан затланы, дарманланы, кече эшикде къалырча жатхан жерлени, жылы быстырланы эм чурукъланы, керекли техника амалла бла ашырыргъа керекбиз. Ары дагъыда тёрт чархлары тартхан бир ненча автомашинаны жиберирге хазырлай турабыз», - деп билдиргенди жыйылыугъа къатышханлагъа Казбек Коков.

Гуманитар жюкню хазырлагъанда инсанла, тюрлю-тюрлю биригиуле, сатыу-алыу бла кюрешгенле, «Биз биргебиз» фондну волонтерлары къатышадыла.

Жыйылыуда республикалы даражада алыннган социал гарантияла толусунлай толтурулгъанлары айтылгъанды. Мобилизациягъа чакъырылгъанлагъа этилген тёлеулени ёлчеми 89 миллионнга жетгенди.

 «Аскерчилени юйюрлерине муниципалитетлени юслери бла чыгъып байламлыкъ жюрютебиз. Белгилейим, келген тилеклеге мычымай энчи къарайбыз», - дегенди республиканы оноучусу.  

Андан сора Казбек Коков онбешинчи ноябрьни ингирлигинде республикагъа Херсон областьдан 500 адам келгенин билдиргенди. Аланы ичинде сабийле эм абадан адамла бардыла. Республикагъа келгенле Нальчикни санаторияларында орнатылгъандыла. Бюгюнлюкде алагъа тийишлисича медицина болушлукъ бериледи, инсанланы кюн сайын керекли бола тургъан затла бла жалчытадыла. Социал службала Херсон областьдан келгенлеге  тёлеулени алыргъа керекли къагъытланы жарашдырыргъа болушадыла, деп билдиргендиле КъМР-ни Башчысыны бла Правительствосуну пресс-службасындан.

Поделиться: