ЕАЭС-ден автомашина келтирирге сюе эсегиз

ЕАЭС-ден автомашина келтирирге сюе эсегиз

ЕАЭС-ге кирген къыралланы (Россей, Белоруссия, Казахстан, Армения, Киргизия) бары да бирикген экономикалы тийреге саналадыла. Алагъа товарланы асламысын бир таможня жорукъла бла кийирирге амал барды. Алай автомашиналаны ташыуда уа ала аз тюрленирге боллукъдула.

Бу къыралладан бирине ол Союзгъа кирмеген къыралдан келген машинаны таможня бла тийишлисича ётдюрселе (пошлинасын тёлеп), аны ЕАЭС-ни ичинде къайсы регионда да боллукъду эсепге салыргъа. Алай аны таможняда «азайтылгъан» ставка бла ётдюрген эселе уа, ол тыш къыралдан келген товаргъа саналлыкъды. Биринчиси бла бир тюрлю чурум боллукъ тюйюл эсе, экинчисинде уа къошакъ къоранчла этерге тюшерикди. Бу материалда аллай машинаны Россейге келтиреме деген адам неге тюберигин билдирирге сюебиз.

Автомобиль Белоруссиядан келе эсе

Бу автомашинаны ЕАЭС товар деген даражасы бар эсе, аны Белоруссиядан бизни къыралгъа келтиргенликге абери тёлерге керек боллукъ тюйюлдю. Алай регистрациягъа салыргъа сюйсегиз а, таможнягъа утилизациялы тёлеуню берирге тюшерикди. Ол алай кёп ахча да тюйюлдю, кеси да машинаны жыл санына кёре тергеледи.

Армениядан а?

Бу къыралдан машина келтирген къыйыныракъ боллукъду. Нек дегенде, ары тыш къыралладан 2014 жылда 10 октябрьге дери келтирилген автомобильни ЕАЭС даражасы боллукъду. Ол кюнден башлап, 2020 жыл 1 январьгъа дери таможнясын ётген машинала уа тыш къыралдан келген товаргъа саналадыла. Алай а келир жыл 1 январьдан башлап, бир-бирлерине уа 2025 жылда 2 майдан сора ЕАЭС товарча кёрлюкдюле аланы.

Тыш къыралладан келген товар деген даражасы болгъан машинаны Россейде жаланда Арменияны гражданлары жюрютюрге эркиндиле. Бизни гражданлагъа аллай эркинлик берилмейди. Алай ала аны таможня бла ётдюрселе уа – жол эркинди.

Киргизияда машина алыргъа

Бу къыралны юсюнден айтханда, аны бла да иш кёп къалмай, тюз Армениядача боллукъду. Киргизияда таможняны 2014 жылда 1 январьда ётген машинала тыш къыралладан келген товарлагъа саналадыла. 2025 жыл биринчи январьдан сора уа ЕАЭС-ни товары боллукъдула.

Аллай машиналаны Россейде жаланда ол къыралда жашагъанла жюрютюрге эркиндиле. Башында айтханыбызча, аланы таможня бла ётдюрюп, битеу керек пошлиналаны тёлесегиз а – сюйгенигизча хайырланыргъа боллукъсуз.

Къазахстанны жорукълары

Бу къырал ВТО-гъа къошулгъаны себепли, ары тышындан машина кийиргенде, ЕАЭС-ни таможня тарифинден эсе азыракъ пошлина тёлерге боллукъду. Аны ючюн таможняны Къазахстанда ётюп, ызы бла Россейге келтирилген автомашина тыш къыралдан келген товаргъа саналлыкъды.

Электромобиль келтирирге сюе эсем а?

Къазахстанда, Арменияда, Белоруссияда эмда Киргизияда электрокюч бла ишлеген автомашинала сатып алыучулагъа таможнялараныда льготала бериледиле. Къысхасы: Россейде жашагъан адамгъа аллай машинаны хайырланыргъа чек салынады. Алып бери келтиреме десегиз а ол къыралда толу пошлинаны тёлерге тюшерикди.