Кёзлери осал кёрген сабийлеге – энчи китапла

РусГидро компанияны келечилери, кёзлери осал кёрген сабийлени Нальчикде 3-чю номерли школ-интернатына энчи жарашдырылгъан китапла бергендиле. Бу жумушну Сокъурланы халкъла аралы кюнюне жораланып бардырылгъан «Китапла – саугъагъа» деген жандауурлукъ акцияны чеклеринде тамамлагъандыла ала.

Алай бла, интернатны библиотекасы жыйырма комплектге бай болгъанды. Гитче окъуучулагъа энергетикле «Къыраллагъа эмда континентлеге жолоучулукъ» деген китапла бергендиле. Ол а аланы жер башында халкъланы маданият байлыкълары бла танышдырады. Аны бетлеринде Сергей Михалковну «Дядя Стёпа» деген назмусу да басмаланыпды. Комплектге тюрлю-тюрлю оюнла да киредиле. Алада дагъыда ол халда жарашдырылгъан дерсле, сора «Жомакълы карандаш» деген электрон устройство барды. Аны бу китапны бетлеринде басмаланнган микрокодлагъа тийдирсе, ол кёп хапарла айтады эмда макъамла согъады.

Китап кеси да тынгылы жарашдырылгъанды: суратлары шатык, тюрсюнлю этилгендиле. Къол бла тийип сезерча, ары-бери тепдирирча аллай жерлери да бардыла. Алай болгъаныны хайырындан сабийле китапны бетлеринде хар нени да «кёраллыкъдыла».

«Энергетиклеге бек уллу ыразылыгъымы билдирирге сюеме, сау болсунла, ала бизни быллай саугъала бла дайым къууандыра туруучудула. Сабийле, биз кесибиз да бек сюйюп къарайбыз алагъа», - дегенди школ-интернатны башчысы Майя Понежева.

Бу акцияны «РусГидро» онбеш жыл бардырады. Аны кезиуюнде юч мингден артыкъ быллай комплект юлешиннгенди. Энчи китапны аны ахчасына «Гитче сокъур сабийчиклеге жасаланнган китапла» деген Фонд басмалагъанды. Ол бир жерде да сатылмайды, жаланда хакъсыз, кеси да къолдан-къолгъа бериледи.