Инсанланы тарыгъыуларына кёре иш тамам болгъанды

Битеуроссей халкъ фронтну (ОНФ) Къабарты-Малкъарда бёлюмюню келечилери, Тырныауузда кёп фатарлы юйледен биринде таза суу бла жалчытыу тап болурча этгендиле.

Айтханларына кёре, ол юйню аллы бла баргъан быргъы тешилип, эки ыйыкъны ичинде фатарлагъа суу тап келмей тургъанды. Адамла тийишли службалагъа сёлешгендиле, алай аладан болушлукъ тапмагъандыла. Иш алай болгъанына кёре быргъыгъа да ремонт этилмей тургъанды.

ОНФ-ни келечилери жерине барып къарагъандыла, бу информация тюз болгъанын ангылагъандыла. Суу ол юйню тюп отоуларына кирип башлагъанын да эслегендиле. Ала айтханларына кёре, юйню мурдору бузулмазча, быллай аварияны мычымай кетерирге керек эди.

«Анда жашагъан гражданла бизге сёлешип билдиргенлеринден сора, болумну контрольгъа алгъанбыз. Ишни сууукъла келгинчи этерге ашыкъгъанбыз. Нек дегенде, суу бузласа, арбаз да жукъгъа жарамазча боллукъ эди. Аны уа ол юйде жашагъанла кеслери тёлеп жарашдыргъандыла. Тюп отоулагъа суу киргени ючюн, анда къурт-къумурсхала жайылып тебирегендиле, кёпге да бармай а, къабыргъалары мугут этип тебирерик эдиле», - дегенди ОНФ-ни эксперти Ислам Макоев.

Ол айтханыча, иш жеринден нек тепмей тургъанын да билгендиле ала. Аны сылтауу – юйню жумушларына къарагъан компания чачылгъанындады. Жангысы уа энтта да къуралмагъанды. Аны себепли письмону Тырныауузну администрациясына ашыргъандыла. Ала уа аварияны талай кюнню ичинде кетергендиле.

 

Улбашланы Мурат хазырлагъанды.
Поделиться: