Ёсюп келген тёлюню патриот ниетледе юйретиуге - аслам эс

Бу кюнледе  Москвада Хорламны музейинде  РФ-ни  Жамауат палатасыны «Сообщество»  форуму бардырылгъанды. Ол быйылны эсеплерин чыгъарыугъа жораланнганды. Аны ишине  коммерциялы болмагъан организацияланы, жамауатны, къырал власть органланы келечилери, волонтёрла, журналистле, предпринимательле, тыш къыраллы  къонакъла  да тири къатышхандыла. Форумгъа  Россейни кёп регионларындан, ол санда жангы къошулгъан территорияларындан да  тёрт мингден аслам адам келгенди.       
Республикадан  ара шахаргъа Владимир Вороковну атын жюрютген Маданият фондну председатели  Люаза Макоева,  «Боевое братство» битеуроссей жамауат организацияны Къабарты-Малкъар республикалы бёлюмюню председатели   Владимир Абаноков,  КъМР-де Жамауат палатаны  члени, «Мирт» социал-культура проектлени арасыны»  директору Юлия Ордокова, Прохладнадан «Шахар электросетьлени генеральный директору»,  КъМР-ни   Жамауат палатасыны члени  Роман Литвинов да баргъандыла.     
Аны ишини юсюнден  хапарны да бизге  ала айтхандыла.
-Бу жолгъу форумну атына аны къурагъанла: «Халкъланы бирликлери: айныу, тенглик!» деп атагъандыла. Анда биз   тюрлю-тюрлю ушакълагъа, эксперт ток-шоуулагъа,  социал магъаналы проектлени презентацияларына да къатышыр онг тапханбыз. Ала бары да кёп къалмай, ёсюп келген тёлюню патриот ниетледе юйретиуге, тёрели хазнаны сакълаугъа эмда  асламланы  алгъа элтирге, сёзлерине  ышандырыргъа боллукъланы   ачыкълаугъа  бурулуп эдиле. Россейге  жангы къошулгъан  Донецк, Луганск, Херсон, Запорожск  областьла бла  бирге  жарашдырылгъан проектлени  къураугъа аслам эс  бурулгъанын да чертирчады,-дегенди  Люаза Магомедовна.
«Бизни барыбызны да бек сейирсиндирген а анда къуралгъан тюрлю-тюрлю магъаналы ишлени  кёплюгю эди.  Къыралны 89 регионундан келген келечилери бир бирлерини сынауларын алыргъа, бир бири бла жууугъуракъ танышыргъа, кёбюрек билирге итиннгенлери. Хар ким да  бирге ишлеуге аслам эс бургъанын да  чертип айтырчады. Сёзсюз, Хорламны музейи  да анга  келишген жер болгъанды. Бизни  барыбызны  да  жаш инсанланы патриот ниетледе юйретиуге жораланнган  майданла кеслерине бютюн бек тарта эдиле. Къабарты-Малкъарны ол жаны бла сынауу бек уллуду, республикабыз ёхтемленирге боллукъ проектле да бардыла. Аланы араларында, сёз ючюн, «Унутургъа жарарыкъ тюйюлдю» деген ат бла телевидениеде  бардырылгъан проектни алып айтыргъа боллукъду. Аны «Къабарты-Малкъар  ГТРК-да» ишлеген  Алим Жаманов  къурагъанды.  Ол Уллу Ата журт урушха къатышханланы юсюнден алыннган отуз тёрт  фильмди. Бек башы уа аны  КъМР-ни  Жарыкъландырыу, илму эмда жаш тёлюню ишлери жаны  бла министерствосу  республиканы мектеплеринде кёргюзтюрге деген оноуну этгениди. Анга ушагъан проектле башха  бир регионда да  жокъдула. Алай, мингле  бла адамланы бирикдирген  уллу федерал проектле  уа кёпдюле, мындан ары  бизни республиканы  да алагъа къатышыр онгу барды»,- деп билдиргенди  Владимир Абаноков.
-Республикадан   баргъан делегацияны къаууму  РФ-ни жамауат Палатасыны  секретарыны орунбасары, Хорламны музейини директору  Александр Школьник  бла тюбешир онг да тапханды. Аны кезиуюнде   Уллу Ата журт урушда Хорламны келтиргенлени юйюрлери  бла бирге  жигитлени  атларын эсден  кетермей  тутарча этиу жаны бла  проектни бирге жарашдырыргъа  келишгенбиз. Алай бла Къабарты-Малкъар  «РФ. Хорламны бетлери» деген  проектге къошуллукъду.  Ата журт урушха къатышхан жерлешлерибизни  атлары  тарыхда къалырча этиу бла байламлы проектни жашауда бардырыуну  къолгъа  Люаза Магомедовна алыргъа  таукелленнгенди. Аладан сора да, форумда эс бурурча затла бар эдиле. Бары да патриотизмге жораланнганла. Ала алтмышдан артыкъ  сессияла, ушакъла, тюбешиуле, презентацияла, кёрмючле болгъандыла. Ушакъладан биринде  жашау-коммунальный мюлклени эмда жолланы болумлары, саулукъ сакълау,  аналыкъны эмда сабийликни, культураны, искусствону, экологияны,  спортну айнытыуну, социал предпринимательствону юсюнден да  сёз баргъанды. Жюрегинг жаратханны  сайла да, барып, тынгылы ишине тири  къатыш, кесинги оюмунгу айт. Бек башы уа аллай тюбешиулеге  къыралны жууаплы къуллукъчулары къатышханлары эди. Алагъа  сорууларынгы да берирге боллукъ эдинг,-дегенди  Роман Литвинов.
Юлия Ордокова уа  форумда жамауат эмда коммерциялы болмагъан организацияланы жашауда  магъаналылыкъларыны  уллулугъуну юсюнден  энчи белгилеп айтханларына  дагъыда  бир кере шагъат  болгъанларын, коммерциялы болмагъан  организацияла регионда  ишле  бла чекленип къалмай,  федерал магъаналы ишлени да бардырыргъа боллукъларыны юсюнден айтылгъанын, быллай  тюбешиуледен сора бютюн тири ишлерге,  регионунгу аты дайым  да игилик  бла айтылып турурча  этерге  итиниригинг келгенин, сёзсюз, алай да этериклерин чертгенди. Форумгъа къатышханла бары да биригип ишлеуню магъанасын белгилегендиле, дегенди.
Форум «Сообщество» 2015 жылдан бери бардырылады.  Бу жолгъу делегациябыз  КъМР-ни  Жамауат палатасы жылны ичинде  бардыргъан ишлени юсюнден  айтхандыла. Артда  ала  къыралны башчысына жетдирилликдиле.
Суратда:  республикадан баргъан делегацияны къаууму тыш къыраллы къонакъла бла.
 
Холаланы Марзият.
Поделиться: