Танг кесек терек орнатыллыкъды

Ноябрьни ал кюнлеринде «Агъачны сакълайыкъ» деген битеуроссей акция башланнганды. Аны чеклеринде   Къабарты-Малкъарда  60 минг терек  орнатыллыкъды. Ала республиканы агъач питомнигинде ёсдюрюлгенледиле.  

Кёп болмай  республиканы паркларында бла скверлеринде  уа беш мингден аслам жёге, акъагъач,  къайын, туя, нарат салыннгандыла. Нальчикде  Хорламны паркында да  юч жюзден аслам терекчик орнатылгъанды.

Бу жол акциягъа  КъМР-ни Табийгъат байлыкъла эмда экология министерствосуну, ведомстволаны, кюч структураланы, жамауат организацияланы келечилери, волонтёрла къатышхандыла – саулай да  600-ден аслам адам. 

Жашиллендириу жаны бла  ишле айны ахырына дери барлыкъдыла эм хар бир муниципалитетде  ётерикдиле. 

«Акцияны магъанасы - жамауатны эсин Россейни агъач байлыгъын сакъларгъа керек болгъанына бурургъады эм аны байыкъландырыргъады.

- Бюгюн акциягъа къатышханла агъач мюлкде ишлегенлени жумушлары бла шагъырейленирге онг тапхандыла эм агъач фондха ахшы къошумчулукъ этгендиле.  Бирси жылладача, бу жол  орнатылгъан  терекле да келген тёлюлеге деп этилген магъаналы жумушду. Быйыл  «Эсгериуню терек бахчасы» эмда «Агъачны сакълайыкъ» деген акцияланы чеклеринде агъач мюлкледе, муниципал  эм шахар тийреледе да 300 минг терек орнатылгъанды,- дегенди КъМР-ни табийгъат байлыкъла эмда экология министри Шауаланы Илияс.

 Эсге сала айтсакъ, акция «Экология» миллет проектге кёре, РФ-ни   Табийгъат байлыкъла эмда экология министерствосуну, Агъач мюлкню федерал агенствосуну,  «Миллет хазнала» проектни  эм  «Эсгериуню терек бахчасы» акцияны чеклеринде  бардырылады.