Хорлам болдуруп, саугъасын, а солдатлагъа жибергенди

Бу кюнледе Ингушетия Республиканы  ара шахары Магасны    администрациясында ишлегенле   бизни айтхылыкъ халкъ поэтибиз,  прозаик эмда журналист, Уллу Ата журт урушну  кезиуюнде аскер  корреспондент, КъМАССР-ни халкъ поэти, Ленинчи саугъаны лауреаты, СССР-ни   эмда РСФСР-ни Максим Горький атлы Къырал саугъаларына тийишли болгъан Къулийланы Къайсын туугъанлы 105 жыллыгъы бла байламлы конкурс  къуралып бардыргъандыла. Аны эсеплерине кёре уа къууанчлы жыйылыу да болгъанды.

Поэтни эсгериуню ингирине  Ингушетия Республиканы эмда Къабарты-Малкъарны жазыучулары, жамауат, илму къуллукъчула, жаш тёлюсю да къатышхандыла.

 Былайда чертип айтыргъа тийишли кёреме Магас шахарда  уллу эмда бек ариу орамларындан бири Къайсынны атын жюрютеди.

Конкурс  шахарны администрациясыны тиширыу советини председатели Магасны  мэриясыны башчысыны орунбасары  Зязикова Макка Салмановнаны  башчылыгъында къуралгъанды. Аны   мураты  ёсюп келген тёлюню ниет культурасын кётюрюуге, патриот ниетледе юйретиуге, фахмулу  сабийлени, абаданланы да ачыкълаугъа эмда алагъа  себеплик этиуге, аны бла бирге уа  айтхылыкъ малкъарлы поэтни чыгъармаларына   сейирни къозгъау  бла байламлы эди.

Конкурсха  Дагъыстандан, Чечен Республикадан, Север Осетия-Аланиядан, Къарачай-Черкесден, Къабарты-Малкъардан, сёзсюз, Ингушетия Республикадан да кёп жаш бла къыз къатышхандыла. Ала поэтни,  чыгъармачылыкъ ишини юсюнден да  кёлден жазмаларын  Магасха жибергендиле. Конкурс комиссияны  къауумуна  Россейним жазыучуларыны союзуну члени , Россейни тиширыуларыны Ингушетияда союзуну тири ишчиси Мальсагова  Айшат Магомедовна да киргенди, андан сора да   Ингушетияны кёп поэтлери, жазыучулары, журналистлери да эс бургъандыла.

Ингирде регионла аралы конкурсну  эсеплери  да туура этилгендиле.

Хасания элдеги Фрийланы Рамазанны атын жюрютген 16-чы номерли мектепни 6-чы «Б» классыны окъуучусу  Алагёз Эмирхан биринчи жерге тийишли болгъанды. Жаш мектепде жаланда «беш» белгилеге окъуйду, Нальчикде  Сабий чыгъармачылыкъны  «Кюнлю шахар» академиясында  «Жилтин» адабият студиягъа жюрюп, поэт, журналист, студияны да ол къурагъанды, бийик категориялы устаз, адабият жаны бла кёп жаш фахмуланы ачыкълагъан Фатима Тамазовада   юйренеди.  Малкъар тилде  шатыкъ сёлешген жашны, Къайсынны чыгъармачылыгъына сюймекликни анасы Кужонланы Марина  сингдиргенди.

«Жилтин» студия ары  он  кёлден  жазманы жибергенди. Аланы жазгъанланы жыл санлары  жетиден  башлана   эди. Конкурсха  70-80-жыллыкъла да  къатышыргъа эркин эдиле.

Онбиржыллыкъ Эмирхан Алагёз  кёлден жазмасында белгили  поэтни «Ёлюмсюзлюкню юсюнден сагъышлары» деген эссесини юсюнден кесини оюмун билдиргенди.

Хорлам болдургъан Эмирханны Ингушетия Республикагъа бу кюнледе чакъырып саугъагъа элли минг сом, диплом, Магас шахарны мэрини грамотасын да   бергендиле. Анасы Марина айтханнга кёре, ол ахчаны бир жартысын жашны ыразылыгъы бла  Украинада энчи аскер операциягъа  къатышан жанларын, къанларын да аямагъан аскерчилеге  жиберликдиле.

Холаланы Марзият.
Поделиться: