Къырал Дума къыйын болумгъа тюшгенлеге ипотека каникулланы къабыл этгенди

Онунчу ноябрьде Къырал Дума техноген эм табийгъат бла байламлы къыйын болумлагъа тюшген инсанлагъа ипотека каникулланы берирге деп жарашдыргъан законопроектни биринчи окъулуунда къабыл этгенди.

Ол документге кёре къыйын болумлагъа саналгъан тизмени санына къошакъла кийириледиле. Башхача айтханда, ол марда бла къыйын болумла болгъан элни эмда шахарны къатында орналгъан энчи эм кёп фатарлы юйледе жашагъан инсанла хайырланыргъа боллукъдула. Сёз ючюн, табийгъат къыйынлыкъны хатасындан ала жашау журтларын тас этген эселе, банкдан алгъан ёнкючлерин, не да ипотекаларын тёлер кезиулерин арт болжалгъа кёчюредиле, деп айтылады законопроектни  ангылатыу къагъытында.

«Табийгъат къыйынлыкъланы эм техноген катастрофаланы хатасындан  адамла къыйын болумлагъа тюшедиле, бир къауумла юйлерин тас этедиле, башхалары ишлерин. Болсада банкдан алгъан ёнкючлери уа къаладыла. Бу законопроект къабыл этилсе, ол къыйынлыкъгъа тюшген инсан ёнкюч алгъан жерине барып, алты айгъа кредитни берир кезиуюн алты айгъа арт болжалгъа салыргъа  боллукъду», - деп ангылатханды «Российская газетагъа» Къырал Думаны ырысхы эм жер байлыкъла бла байламлы сорууларгъа къарагъан комитетни келечиси Анатолий Бифов. 

Россей Федерацияны Правительствосу бу законопроектге ыразылыгъын билдирген эди, алай экинчи окъулууна дери анга тюрлениуле кийирирге керекгин да жазып. «Россей Федерацияны законодательствосу бла табийгъат къыйынлыкъланы эм техноген катастрофаланы хатасындан адамгъа тюшген заран бла байламлы къайсы къырал орган тийишли къагъытланы берирге керекди заемщикге», - деп айтылады правительствону къагъытында.

Документни сюзген кезиуде депутатла бу сорууну бир къауум регионлагъа уллу магъанасы болгъанын чертгендиле, нек дегенде, артыкъда туристле айланнган жерледе табийгъат къыйынлыкъла терк-терк бола туруучудула.

Бизни корр.