Даражалы чемпионатдан – хорлам бла

Кёп болмай Москвада саулукълары бла байламлы чекленнген онглары болгъанланы арасында профессионал усталыкъдан "Абилимпикс" миллет чемпионат болгъанды. Анга Россейни 78 субъектинден 40 компетенцияда 1100 адам къатышханды. Къабарты-Малкъардан а Гергъокъланы Лейля баргъанды. Ол  "Специалист" компетенцияны «Тигиучю» категориясында биринчи жерге тийишли болгъанды. Лейляны конкурсха хазырларгъа  Нальчикни женгил промышленность колледжини мастери  Залийханланы Лейля болушханды.  

Быйыл сентябрьде узакъдан бардырылгъан Миллет чемпионатха хазырланыу башланнган эди. Анга чеклеринде къыралны регионларындан студентле, школчула эм мастерле 80 компетенцияда кючлерин сынагъандыла. Республикада эришиулени регион кесеги Къабарты-Малкъар къырал университетни, тёрт колледжни, сабий-жаш тёлю спорт-адаптив школну  мурдорларында баргъанды. Бу жол алтынчы регион чемпионатны финалына жыл санларына кёре он конкурсант ётгенди. 

Къабары-Малкъарда "Абилимпикс" биринчи кере 2018 жылда бардырылгъанды. Тёрт жылны ичинде анга  254  адам къатышханды. Бюгюнлюкде аланы асламысы неда  215-си   республиканы ичинде иш бла жалчытылыннгандыла.  

Эсге сала айтсакъ, "Абилимпикс" "Россей – онгланы къыралы" платформаны  эм «Билим бериу» миллет проектни чеклеринде бардырылады. Конкурсда – информациялы технологияла, медицина, промышленность,  чыгъармачылыкъ, декоратив искусство, экономика, финансла эм башха усталыкъладан айырмалылыкъларын кёргюзтюрге онг барды.