Аскерчилерибизге - сабийледен саугъала

Кёп болмай Элбрус районну онюч билим бериу учреждениясыны окъуучулары Украинада энчи операциягъа къатышхан аскерчилерибизге жылы затла эм башха абериле  жыйып, Нальчикге пунктха жибергендиле.  

- Акция баргъан кезиуде сабийле, ата-анала, устазла эм башхала да кеси къоллары бла эшген аслам жылы кийим  келтиргендиле. Ол санда  чындайла, къол къапла, бёркле эм башха затла да. Саулай алып айтханда, аланы саны беш мингнге жууукълашады. Бюгюн аланы Газель машина  бла РФ-ни Сауутланнган кючлерини аскерчилерине берирге келтиргенбиз.  Аны районну окъуучуларыны атындан  школчула  Хаджиланы Даут, Узденланы Назиля эм  Светлана Аладина келтиргендиле,- дейди Элбрус муниципал районну    пресс-службасыны таматасыны къуллугъун толтургъан Тилланы Алина. 

- Россейде юйюрлени иги кесегинде ыннала, анала халыдан  абериле эшедиле. Анга жаш тёлюню да юйретедиле. Биз да таматаланы хайыры бла  ол фахмудан юлюш алгъанбыз. Къыш  сууукъла башланыргъа кёп къалмагъанды. Ол себепден аскерчилерибизге  кеси къолларыбыз бла эшген жюнден абериле келтиргенбиз,- дегендиле школчула да.

Аскерчилеге саугъала бла бирге сабийле жазгъан письмола эм суратла да берилликдиле.  Белгилисича, фронтдагъыла аланы бек сакълайдыла эм жюрек жылыулукълары бла окъуйдула. 

Эсге сала айтсакъ, бу кюнледе КъМР-ни Жаш тёлюню ишлери жаны бла министерствосу болушуп  республикада Волонтёрланы   ресурс арасы да  жылы кийимле, продуктла, дарманла эм адамгъа биринчи керек болгъан башха затладан  гуманитар болушлукъ хазырлап ашыргъанды. Аны  “Новая высота”фондну келечилери Запорожский областьда мобилизациягъа тюшген жерлешлерибизге эм башхалагъа да тапдырлыкъдыла.