Сабий чыгъармачылыкъ школну жангыртадыла

Кёп болмай РФ-ни Къырал Думасыны депутаты Геккиланы Заур бла   КъМР-ни культура министри Мухадин Кумахов Прохладныйде «Культура» миллет проектге кёре, Сабий чыгъармачылыкъ школда тынгылы ремонт къалай баргъаны бла шагъырейленнгендиле. 

Ишчи комиссия бла бирге мекямны жангыртыууна Прохладнаны администрациясыны башчысы Вячеслав Архангельский, аны биринчи орунбасары  Максим Ломов эм жашау журт-коммунал  мюлк  управленияны таматасы Беслан Эздеков къатышхандыла.

Бюгюнлюкде школгъа  тёрт жюзге жууукъ сабий жюрюйдю. Ала жырларгъа, тепсерге, дизайннге, театр усталыкъгъа эм башха затлагъа келедиле.  Педагогла, окъуучула эм саулай элчиле да жангыртылгъан  мекямны  ачылырын ашыгъып сакълайдыла.  Аны чеклеринде  тозурагъан  уллу залында сахнаны,  олтургъан жерлерин, оборудованиясын, тепсеучю залда станокларын, мекямны тыш къабыргъаларын  эм арбазын да айбатландырлыкъдыла.

Бусагъатда школну терезелерин, эшиклерин, полларын, концерт залда жылытыучу системаны алышып  бошап, сюртю-бояу ишлени тамамлай турадыла. Жууукъ заманда артистлеге сахнагъа чыгъаргъа тынч болурча къошакъ реконструкция бардырыргъа план барды.

 

 

Бини корр.
Поделиться: