Устаз болгъан а тынч тюйюлдю

Кюлкюню, оюнну, чамны  ким да сюеди. Ала болгъан жерде хар зат да тапды, сыйдамды, аламатды, жарыкъды. Аллай  кюнле  кёп да болуп, кёпге  дери эсде къалырча этер ючюн , Нальчикни  32-чи  номерли мектебинде сейирлик «дерсле» къуралгъандыла. Абадан классланы окъуучулары, мектепни директоруну, аны орунбасарыны, устазланы къуллукъларын толтура, кичи класслада дерсле бергендиле. Устазла уа тёрт сагъатны ичинде парталада олтургъандыла.

Таматала кеслерин школчулача жюрютгендиле, дерсни кезиуюнде, алача, бир бирлери бла телефон бла да сёлешгендиле, хыпыярлыкъ да этгендиле. Кечигип да келгендиле. Анга сылтаугъа уа буфетде очередьде тургъанбыз, дегендиле.

Дерследе  кеслерин тапсыз жюрютгенлени «устазла» директоргъа жибергендиле, ата-аналарын чакъыртхандыла, дневниклерине жазгъандыла. Битеу ол затла оюн халда баргъандыла. Болсада, мектепчиле айтханнга кёре, «Кеси  аллына башчылыкъ  этиуню кюню»  алагъа  уллу дерс эм сейирлик  сынау эди. Аны юсюнден ала былай дегендиле:

Аминат Пачева: «Бу  кюн бизге бек хайырлы ётгенди, устазны иши алай къыйын болгъанын бу жолгъа дери билмегенбиз. Кертида, алагъа уллу тёзюмлюк, чыдамлыкъ да керекдиле».

Чабдарланы  Азамат: «Бизни бир устазыбыз дерследе асыры кёп сёлешгенден бла солургъа чыкъгъан кезиуде окъуучулагъа къычырып тургъандан тамагъы ауругъанды, ауазы окъуна къарыкъгъанды. Мектепни кесини радиосун да хайырланнганбыз. Аны бла программа къурагъанбыз. Устазларыбызны, окъуучуланы да  кюлкюню кюню  бла алгъышлагъанбыз. Чам  хапарла да айтханбыз.    Устазны  ишини юсюнден айтханда уа, алагъа,  керти да, жашауларында эсгертме салыргъа окъуна керекди. Энди ангыладыкъ, аланы бизге нек урушханларын да».

Мадина  Хуштова: «Быллай кюнлени, мен  оюм этгенден, терк-терк къурап бардыра турургъа керекди. Бу биринчи сынау ишибиз эди. Анга «иги»  деген белгини салыргъа боллукъду. Устазланы ишлери, керти да, къыйын болгъанын, биз а  бир-бирледе кесибизни тап жюрютмегенибизни, аланы  жюреклерин къыйнагъаныбызны ангылагъанбыз. Мындан ары бизни классны окъуучулары ол затланы барын да эсге аллыкъларына ышандырама».

  Окъуучуланы орунларында болгъан устазладан бири – профессор, математикадан  билим берген  Валерий Ревелис  проектни  юсюнден былай айтханды:  «Биз, устазла, дерсни  кезиуюнде, сабийле кеслери  этиучюлей, бир бирлерибиз бла сёлешип, бир бирге къагъытла, къагъыт самолётчукъла  жиберип, дерсни  кезиуюнде  къызла кюзгюге къарап, тырнакъларын тазалап да олтургъанбыз. Дерслеге  кеч болуп  келгенбиз.

Къысхасы, окъуу  къайгъылы болмай эдик. Устаз а, сёз  ючюн, мени дерсни кезиуюнде къатымда олтургъан бла сёлешгеним ючюн директоргъа жибергенди. Окъуучула, бизни орунубузда болуп, кеслерин сынадыла. Ала бизни  юсюбюзде кёрдюле устазны иши тынч болмагъанын. Мындан ары да быллай кюнлени бардыра турургъа оноу этгенбиз. Аны да жылгъа бир кере угъай, асламыракъ.

Бу жолгъу дерс ОБЖ-дан эди. Битеу бу  кюн окъуучуланы сынау эди. Ала да ол сынаудан жетишимли ётгендиле деп таукел айтыргъа боллукъду. Кичи класслада берген дерслери да сейирлик эди. Къысхасы, сабийле  борчларын иги тамамлаялгъандыла».

«Бу оюн дерслени къурап, устазланы бла окъуучуланы араларын жууукълашдырыугъа деген муратны салгъан  эдик да, ол толгъанды, деп таукел айтыргъа боллукъбуз. Бек башы уа  - окъуучула кеслерин сынап кёргендиле. Ол затла бизни  ишибизде, аланы окъууларына да жарарыкъларына ийнанабыз»,- дегендиле педагогла бир аууздан.

Суратлада: дерсни кезиуюнде;  ОБЖ дерсде биринчи болушлукъ этерге юйретиу.

Суратны автор алгъанды.