Эл мюлкде болум

Алманы жыйып бошай турадыла

Бюгюнлюкде Бахсан  муниципал районда терк айныгъан эм тёрели терек бахчалыкъла 4241 гектарда  ёседиле. Бирси жерледеча, мында да жемишлени  къышха асыраргъа жарагъан сортларын жыйып кюрешедиле. Бусагъатда тирликни 3227 гектарда кетергендиле эм 94 914 минг тонна жыйгъандыла.   

Алмаланы жыйгъандан сора тюзюнлей 24 минг тонна  кёгет сыйыннган комплексге сакъларгъа  ашырадыла. Мында продукцияны жарашдыргъан – калибровка этген эм сатаргъа  хазырлагъан  цехледе да орналадыла. 

Эсге сала айтсакъ, Бахсан район терек бахчалыкъ жаны бла   тынгылы жалчылыннган, Россейде эм жетишимли къармашханладан бирине саналады. Мюлкле кеслерини питомниклеринде ёсдюрюлген  терекчиклени орнатадыла, башха материалланы да жеринде чыгъарадыла.  Ол санда кеслерини  жемишлени  сакъларча комплекслери эм  жарашдыргъан цехлери да барды.  

Картофдан бай тирлик къууандырады

Быйыл Къабарты-Малкъарда картофну 7 минг гектрда салгъандыла. Шимал- Кавказстатны эсеплерине кёре, биринчи октябрьде мюлклени барында да, 6,4 минг гектарда, неда бахчаланы 91 процентинде  130,8 минг тонна тирлик жыйылгъанды.   Ол толусунлай былтыргъы кёрюмдюге келишеди.

Саулай алып айтханда, бир гектардан 203 центнерден аслам  чыгъады. Былтыр бу заман бла  тенглешдиргенде, ол 16 процентге кёпдю. 

Республиканы мюлклеринде бу кюнледе картофну жыйып бошар муратлыдыла.

Малчылыкъда - ахшы кёрюмдюле  

Къабарты-Малкъарны Эл мюлк министерствосундан билдиргенлерича,  быйыл тогъуз айгъа малчылыкъда ахшы кёрюмдюле эсленедиле,  эт эм сют продукциягъа да танг къошулгъанды.

Былтыр бу заман бла тенглешдиргенде,  мюлклени барында да  малланы бла юй къанатлы  этден  73,7 минг тонна  сатылгъанды, неда  4,3 процентге кёп. 

Сагъынылгъан кезиуде сютден  394,4 минг тонна сауулгъанды, неда 3,4 процентге  кёп.  Жумуртхаладан 159,6 миллиону алыннганды, мында да  2,6 процентге  ёсюм эсленеди. 

Быйыл сагъынылгъан кезиуде тууарланы саны кёбейгенди: 1,9, къойланы бла эчкилени - 2,5 эм юй къанатлыланы 5,1 процентге.