«Адам туугъан журтун сюерге, аны сейирлерин сакъларгъа борчлуду»

10 ноябрь – Полициячыны кюню

Татчаланы Владимирни жашы Асхат  жашауун  Ата журтха къуллукъ этиу  бла байлайды.  Асхат Владимирович   Нальчикни УМВД-сыны 2-чи бёлюмюнде ишлегенди,    Элбрус районда уголовный розыскга таматалыкъ этгенди.   Ызы бла Шимал Кавказда терроризмге къажау арагъа кёчюрюледи. Анда ол ведомствону башчысыны орунбасарыны къуллугъуна дери ёсгенди, пенсиягъа   подполковник  чында чыкъгъанды. Ич ишле органлагъа жашаууну 27 жылын бергенди.

Жашлыкъны къыйын жоллары 

Аны жашлыгъы къыйын кезиуге тюшгенди – ол Афганистанда къазауатха къатышханды, интернационал борчун толтургъанда кёргюзтген батырлыгъы ючюн Къызыл Жулдузну  ордени бла саугъаланнганды. Жаш битеу дуниягъа белгили  Хорог чекчи отрядны десант-штурмовой къауумунда къуллукъ этгенди. 

Татча  улу Афганистаннга тюшгенинде, башха жашлача, жашауну татыуун  билмегенди, сынауу болмагъанды. Ол школну бошап, агромелиоратив институтну зоотехния факультетине окъуугъа киреди. Биринчи семестрден сора аскерге къуллукъ этерге чакъырылады.

- 1984 жылда тюшгенме Афганистаннга. Биз интернационал борчубузну толтурургъа ашырыллыгъыбызны букъдурмай айтхан эдиле,-деп эсгереди ол. -  Ленинаканнга элтедиле биринчи. Бир ай юйренип, ызы бла Нахичеваньда сержантланы школун бошайма, андан а Хорог чекчи отрядха ашырадыла. 

Десант-штурмовой отрядны къауумунда нёгерлери бла Асхат 29-чу энчи операциягъа къатышханды.    18-19-жыллыкъ жашлагъа къыралыбызны чеклерин наркотиклени ташыгъанладан сакъларгъа, террористле жыйылгъан  жерлеге вертолётлада учуп, аланы  жокъ этерге, кишлаклада букъгъан душманнга къажау турургъа, ёлюмню кёзлерине къараргъа тюшгенди.

Урушдан да къыйын

Аскерден къайтхандан сора ол жашауун  право низамгъа, законлукъгъа къуллукъ этиу  бла байлайды. 

- Алыкъа удостоверениям да жокъ эди – стажёр кезиуюм. Нальчикде Ленин атлы проспектде тиширыула алтын сатхан жерде бир ишекли жаш адамны кёреме.  Ол алтынланы учуз багъасы бла терк окъуна сатаргъа кюрешгенди. Аны бёлюмге жетдиребиз. Тохтаусуз эки кюнню   ушакъ этгенме жаш бла:  чай ичире, сёлеше, - аны да кесими да бошламай. Алай бла биргесине   болгъан алтынла аманлыкъ этилген жерледен урланнганлары ачыкъланадыла. 1992 жылда, эсигизде эсе, республикада таксистлени ёлтюргендиле. Жаш   кимни, къачан, къалай ёлтюргенин, машиналаны къайда букъдургъанын толусунлай айтады. Машиналаны Камменномостское элни тийресинде дорбунда тапхан эдик. Ол мени бек биринчи ишим болгъанды уголовный розыскда. Эсимдеди, аны ючюн манга 30 минг сом премия бергендиле. Ол жыллада уа стажёргъа 3 минг сом тёленнгенди»,-деп ышарады ушакъ  нёгерибиз.

Право низамны сакълаучу органлада къуллукъ этген жыллада  урушдан да къыйын болумлагъа тюшгенме, дейди ол.  Къазауатда  душманны,    не ючюн сермешгенинги билесе.  «Мында уа кеси адамларыбыз бла къазауат этерге тюшгенди.   2000 жылла Россейге, Кавказгъа да сынауладан толу болгъандыла. Тыш къыралла,   кеслерини сейирлерин  толтура,  Кавказда тынчлыкъны бузаргъа умут этгендиле. Манга радикаллагъа, экстремистлеге къажау турургъа тюшгенди»,-дейди ол.

Ич ишле органлада бет жарыкълы къуллукъ этгени ючюн а Татчаланы Асхат ведомстволу белгиле бла  бирге  «За  отвагу» майдал,  За заслуги перед Отечеством  орденни 2-чи даражалы майдалы бла да саугъаланнганды.

«Урушну унутургъа кюрешеме»

Бюгюнлюкде Асхат  Владимирович пенсиядады, жаш жылларында сайлагъан усталыкъгъа къайтханды -   малчылыкъ бла кюрешеди, тау  бал чибинчиликни  жангыртады.

Ушагъыбызны кезиуюнде Асхат жаш тёлюге къадарларын кеслерини къолларына алыргъа  чакъырады. «Оюм этип, алай сайлагъыз жашауда жолугъузну. Ич ишле органла, аскер, мамыр усталыкъла болсунла, барысы да магъаналыдыла. Хау, аскер жашны къаты этеди, жууаплылыкъгъа юйретеди. Алгъын аскерде къуллукъ этмеген жашла бла къызла тепсерге окъуна унамаучу эдиле.  Алай жашауда жолну   оюм этип сайларгъа керекди. Жюрегинг тартмагъан иш къууанч, насып да келтирлик тюйюлдюле»,-дейди ол.

Адам туугъан журтун сюерге, аны сейирлерин сакъларгъа борчлуду, деп акъыл этеди ветеран. Асхат да сабийлерине туугъан журтубузгъа къуллукъ этиуню юлгюсю болгъанды. Жашладан тамата Ахмат, атасыны ызындан барып, ич ишле органланы сайлагъанды. Ол  уголовный розыскда  ишлейди.

Эгизле Расул бла Руслан да погонла жюрютедиле.  Биринчиси Пермьде аскер институтну бошагъанды, Орел шахарда  ишлейди. Руслан а контракт бла Кантемир атлы дивизияда къуллукъ этеди. Жашладан кичи Алимни  муратлары да уллудула. Аладан бек магъаналысы уа - Санкт-Петербургда аскер-медицина институтха кириргеди.