Школланы саны кёпден-кёп бола барлыкъды

«Билим бериу» деген миллет проектни чеклеринде Басхан шахарда жангы микрорайонда орта школну къурулушу барады. Аны проектине кёре ол 1224 жерли боллукъду. Шёндю анда къурулушчула юч къатлы корпусну сюей турадыла. Аны отоуларыны битеулю ёлчеми 26 мингден артыкъ квадрат метрди. Спорт майданчыкъланы мурдорларын хазырлау иш да тири барады.

Мектепни актовый залына 560 адам сыйынырыкъды. Школда дагъыда ашхана, тепсеу зал, санузелле, жууунурча бёлюмле да къурарыкъдыла. Проектге кёре, агъач эмда темир бла кюреширге, сора быстыр тигерге тийишли мастерскойла да боллукъдула. Дагъыда юй жумушлагъа къараргъа юйретген эмда рекреациялы кабинетле, спорт бёлюмле да ишлерикдиле анда. Билим бериу учрежденияны тийресинде воркаут-майданчыкъ, ойнаргъа эмда солургъа тийишли жерле да жарашдырыргъа дейдиле. Тюрлю-тюрлю жыйылыула, тюбешиуле, акцияла бардырыргъа онг болурча участок да бёлгендиле. Объектни къурулушун келир жылны ахырында бошаргъа дейдиле. Хайырланыугъа да ол заманда берилликди.

Быйыл а Прохладныйде, Нарткъалада эмда Куба элде ишлене тургъан жангы орта школла битерикдиле. Аланы барыны да отоуларыны ёлчеми 1785 квадрат метрди. Прохладныйде андан сора энтта бир мектеп ишлене турады, дагъыда бир школгъа уа тынгылы ремонт этилликди. Нарткъалада быллай тёрт учреждение жангыртылады, келир жыл а энтта да бир жангы школну къурулушу башланырыкъды. Куба элде орта школну къатында да жангы корпус ишлене турады.

Саулай айтханда, 2023-2024 жыллада Къабарты-Малкъарда онбеш жангы школ сюерикдиле эмда 40 чакълы мектепни жангыртырыкъдыла.