Бюйрекледе ташла къоркъуулудула?

Арт заманда бюйреклеринде ташлары болгъанла кёп болуп барадыла. Ол не бла байламлыды? Аны юсюнден онколог эм уролог  Улбашланы Азамат бла ушакъ этгенбиз.

- Бюйрекледе ташланы составларыны магъаналары бармыдыла? Карбонат ташла тынч ууаладыла деген кертимиди?

- Аурууну хирургия амал бла багъыуну  сайлай туруп, ташны уллулугъуна-гитчелигине, ол къалайда орналгъанына, аны рентген бла къарагъан заманда кёрюмдюсю къаллай болгъанына уллу эс бурургъа керекди. Бир кюнню ичинде сийдикни жукъартыр ючюн, 1,5 литр сууну ичерге керекди.  Фитотерапия профилактиканы да уллу къыйматы барды. Саулугъугъузну дайым контрольда тутугъуз: юч - алты айдан бир кере  анализ этдире, жарым жылдан сора уа бюйреклеригизни УЗИ бла тинтдире-тинтдире туругъуз. Къууугъугъузну да алай.

- Бюйрекледе ташла болгъанлыкъгъа, ала тынгысыз этмеселе, тиерге керекмиди?

- Хар зат да аланы уллулукъларына-гитчеликлерине, ала къалай тюрлене баргъанларына кёре боллукъду. Бюйрекледе, къууукъда ташла бар эселе, ала аурууну чыгъарлыкълары, адамны ёлюмге окъуна жетдирликлери хар кимге да белгили болургъа керекди. Ол себепден а сийдик жюрюген ачыкъ жерлеге операция этилирге керекди.

Башха кезиуледе уа врачла юч амалны хайырланадыла: дистанциялы литотрипсиягъа, трансуретральный контакт неда терини кесип нефролитолапаксия амалланы хайырланадыла. Биринчисини кезиуюнде орта ёлчемли ташланы (1-ден 1,5 сантиметрге дери) энчи аппарат бла, тышындан узалып, уатадыла. Бирси эки амалны кезиулеринде уа уллуракъ ташланы адамгъа операция этип  кетередиле. Бу тюрлю багъыула кезиулеринде бардырылмасала, бюйреклени тислонефит ауруулары башланады.

Саусузну бюйреклеринде ташларын кетерир ючюн, анестезия этиу амал хайырланылады, андан сора адамны бюйреги болгъан жеринде тешик этиледи, УЗИ эм рентген аппаратла бла контроль этип, инструментни сугъуп, таш ууатылады.

Ол тюрлю амалланы хайырларындан саусуз ташладан къутулургъа боллукъду, тири жашаугъа къайтады. Ол тюрлю ишлени къыйматлары врачны усталыгъына кёре боладыла.

- Ташны кетерген этгенликге, ала  дагъыда чыгъаргъа боллукъдула  деген тюзмюдю?

- Жарсыугъа, хакъ,  ауруу жангыдан келип да къалады. Диетаны къаты тутаргъа керекди. Операциядан сора этден, чабакъдан жарашдырылгъан ашарыкъланы не къадар аз хайырланыгъыз: алада пуринле кёпдюле.  Сууну кёп ичерге керекди (бир кюннге 1 – 1,5-2 литрин). Фитотерапия затла бла багъыуну да къыйматы уллуду. Ала  бюйреклени ташладан тазалайдыла.

Сёзсюз, адам кесини саулугъун дайым да контрольда тутаргъа керекди – юч - алты айдан бир кере  анализле этдирип турсагъыз, заманында багъылыннган ауруу саулукъну бузмайды, жашаугъа да къоркъуу болмайды.