Ата-ана хакъсыз турургъа эркиндиле

Келир жыл 1 январьдан 317-ФЗ номерли закон кючюне киреди, ол быйыл 14 июльда жарашдырылгъанды. Ол «РФ-де инсанланы саулукъларын сакълауну асламлы гарантияларыны юсюнден» 323-ФЗ номерли законнга тюзетиуле кийиргенди.

КъМР-ни прокуроруну тамата болушлукъчусу Сотталаны Жаннаны бизге ангылатханына кёре, законну 51-чи статьясыны 3-чю кесегине кийирилгендиле тюзетиуле. Алагъа кёре,  сабийни саулугъуна стационарда бакъгъан кезиуде, аны атасы, анасы, неда законлу башха келечиси биргесине хакъсыз турургъа эркинди.  

Бу статьяны 3-чю кесегини 1-чи пуктунда уа сёз сакъат сабийлени юслеринден барады. Саулугъуна кёре, чекленнген онглары болгъан бала медико-социал тинтиуледен сора реабилитация программадан ётгенде, ол саулугъунда болгъан заранны хатасындан кесини кереклерин толтуралмаса, кеси жюрюялмай неда сёлешалмай эсе, жууукъ адамына аны биргесине хакъсыз турургъа эркин этилгенди. Быллай  себеплик  дагъыда тёрт жылгъа дери баланы ата-анасына, башха жууукъ адамына да этиледи.    Тёрт жылдан тамата сабийге уа жууукъ адамы бла  бирге турургъа эркинлик медицина эсгертиулеге кёре берилирге боллукъду.

Андан сора законну 80-чи статьясыны 3-чю кесегини 4-чю пунктуна да кийирилгендиле тюрлениуле. Инсанланы саулукъларына хакъсыз болушлукъ бериу жаны бла къырал неда регион гарантиялагъа тийишлиликде,   медицина учрежденияда сабийлери бла бирге тургъан законлу келечилерине  тёшекни, аш-сууну да учреждение берирге керекди.

Тикаланы Фатима жазып алгъанды.
Поделиться: