Фатарны кёргюзтюр ючюн хакъ излегенди

Быйыл октябрьде Нальчикде УМВД-гъа 29-жыллыкъ жаш адам тарыкъгъанды. Ол билдиргенича,   юй бийчеси бла шахарда болжаллы халда жашаргъа фатар излегенди. Бу ишде уа ала бла кёп болмай танышхан тиширыу болушургъа айтханды.

Алай фатарны берирден алгъа уа 15 минг сомну аны банк картасына ётдюрюрлерин излегенди. Журтну  андан сора кёргюзтюрге сёз бергенди. Алай ахча къолгъа тюшгенлей, тиширыу тас болгъанды.

Полициячыла РФ-ни УК-сыны 159-чу статьясыны 2-чи кесегине кёре терслеу материалла ачхандыла (хыйлачылыкъ). Право низамны сакълаучула тийишли излеу мадарла бардырып, ишеклини ачыкълагъандыла. Ол Нарткъаладан 34-жыллыкъ тиширыуду. Анга юйден тышына чыкъмазгъа эмда къоранчланы къайтарыргъа деген оноу чыгъарылгъанды.