Спортну кеси да сюйгенди, башхаланы да анга табындырыргъа итиннгенди

Маглуланы Зулкъарнийни жашы Хусей Тырныауузда физкультураны бла спортну айнытыугъа уллу къыйын салгъан адамларыбыздан бири болгъанды. Спортну кеси да сюйгенди, башхаланы да анга табындырыргъа итиннгенди. Ол штанга кётюрюу бла гитчелигинден кюрешгенди, кючлю спортчугъа саналгъанды. 1961 жылда Тырныауузда ауур атлетикадан республиканы чемпиону болгъанды.

Аскерде да Хусейни, гиртчи, къарыулу болгъанын кёрюп, спорт ротагъа алгъан эдиле. Анда ол, Шимал-Кавказ аскер округну намысын къоруулай, ауур атлетикадан алчы жерлеге чыгъа тургъанды. Аскер округну биринчилигинде спортну устасына кандидат да болгъанды.

Аскерден къайтхандан сора, Маглу улу Грозныйде университетни физкультура факультетине киреди. Анда  окъугъан беш жылны ичинде кесини ауурлугъуна кёре штанга кётюрюуде Чечен-Ингуш Республиканы чемпиону болгъанлай тургъанды.

Урунуу жолун а Хусей 1967 жылда  Тырныауузда тамата тренер болуп башлагъанды. Жаш адамланы спортну сюерге юйретиуге уллу кюч салып кюрешгенди. Тырныауузну 3-чю номерли профессионал-техника училищесинде физкультура ишге башчылыкъ этгенинде, Минги тауну тийресинде «Трудовые резервы» солуу базаны директору болгъанында да, жаш адамланы спортха сюймекликлерин къолундан келгенича кючлегенди.

Къураучу хунери, физкультурадан бла спортдан уллу ангылауу болгъан жашны 1980 жылда «Бахсан» спорт комплексге директор этедиле. 1985 жылда уа ол комплексни мурдорунда уллу спорт комбинат къуралады. Мында уа Маглуланы Хусейни хунери бютюн бек ачылады. Битеу адамланы, жаш, къарт, сабий деп къарамай, физкультурагъа бла спортха аслам къатышдырыуну кесини баш борчуна санайды. Ол жаны бла жетишимле да болдурады. «Физкультура эмда спорт бла кюрешгенлени санына бир адам окъуна къошулса, жюрегим къууанады»,- деучю эди ол.

Хусей башчылыкъ этген саулукъландырыу комбинатны спорт базасы да бек игиледен бирине саналгъанды. Анда СССР-ни тюрлю-тюрлю жыйымдыкъ командалары уллу эришиулеге хазырланып тургъанлары да анга шагъатлыкъ этеди. Олимпиадагъа барырны аллында Совет Союзну кёп белгили спортчулары Тырныауузну спорт комбинатында жараула этгендиле.  Аны таматасыны уа намысы бек жюрюгенди. Анга берилген грамоталадан биринде былай жазылыпды: «Кёп жылланы Тырныауузда физкультураны бла спортну айнытыугъа жигер къатышханы, саулукъландырыу жаны бла ишни тап къурагъаны ючюн». Башхасында уа – «СССР-ни женгил атлетикадан  чемпионкасын, халкъла аралы классдагъы спорт устаны, СССР-ни жыйымдыкъ командасыны члени Светлана Червякованы эришиулеге хазырлаугъа болушханы ючюн».

 Маглуланы Хусей жаш адамланы къуруда былай  айтып юйретгенди: «Замансыз къартаймаз ючюн, къартайгъанла да къартлыкъларын замансыз сезмез ючюн физкультура эмда спорт  бла кюрешигиз, аны магъанасы уллуду. Спортха табыннганла тютюн, аракъы ичиуден керидиле. Ала тенглеринден иги да саулукълудула». Ма ол сёзлери   насийхат болуп къалгъандыла.

Текуланы Хауа.
Поделиться: