Ток тас болмаз ючюн

«Россети Северный Кавказ»-«Каббалкэнерго» биригиу энергокюч эркинликсиз аслам къоратылгъан Зольск, Бахсан районлада бла Бахсан шахар округда  ток тас болгъанын азайтырча программаны бардырады.  Бюгюнлюкде компания кеси ахчасына  элекрокючню  эсеплеген 37 500 чакълы прибор салгъанды. 

Сагъынылгъан программаны хайыры бла жангы учёт бардыргъан  цифралы системаны сингдирирге эм  0,4 -10 кВт ток ызланы  220 километрин  жангыртыргъа онг табылгъанды. 

Жашау журтланы иелери жангы эсеплеген приборланы къыйматлыгъын къысха заманда сезгендиле. Энди ток бла жалчытхан компанияны келечилери, показанияланы жазып алырча арбазланы терк-терк  жокъларыкъ тюйюлдюле.   Жангы прибор орамда чыпында, адам заран жетдирмезча  орнатылады. Абонентлени хар бирине да энчи  пульт берилгенди. Аны хайыры бла ай, кюн эм сутка  сайын токну къаллай бир тёленнгенин билирге жарайды.  

Бир тюрлю бузукълукъ чыкъса, электрокюч биригиу тюзюнлей халда аланы кетерирча мадар этеди.  Ол санда хайырланыучула хыйлалыкъ бла  токну урларгъа излеселе аны юсюнден оператив халда биригиуге билинирикди.   Аллай бузукълукъ ачыкъланса, этилген къоранчны ёлчеми тинтилирча акт жазыллыкъды.  Аманлыкъчы экинчи кере тутулса  уа, РФ-ни Административ бузукъла жаны бла кодексини 7.19-чу статьясына тийишлиликде (Кеси аллына ресурс бла жалчытхан сетьлеге къошулгъан неда эсеплеген прибору болмагъан)  жууапха тартыллыкъды.  Анга кёре,  энчи адам - 10-15, къуллукълары болгъанла - 30-80 эм организация 100-200 минг сом тазир тёлерге тюшерикдиле. Экинчи кере бузукълукъ этгенлеге тазирни ёлчеми иги да уллу боллукъду. Бир-бир кезиуде уа алагъа уголовный иш ачылыргъа къоркъуу барды.   

Эсге сала айтсакъ, абонентни бла энергокюч биригиуню  арасында ангылаусузлукъ болмазча, ол санда ток ызлагъа тийишли халда  къошулурча «Россети Северный Кавказ»-«Каббалкэнерго» биригиуню бу телефон номер бла «къызыу ызына» сёлешип билдирирге боллукъду: 8-800-220-0-220.