Къабарты-Малкъарны Жамауат палатасында конкуренция болумлада айнырыкъ производстволаны къурау, импортну алышындырыу программаланы жарашдырыу эм промышленностьну технология жаны бла жангыртыуну эсеплерин тинтгендиле. 

Палатаны экономиканы айнытыу, предпринимательствогъа болушлукъ этиу, жашау журт-коммунал мюлк, курортла эм туризм комиссиясыны башчысы Владимир Павленко бюгюнлюкде республиканы толтуруучу власть органлары бу жаны бла  проблемалагъа кёре тийишли мадарла этгенлерин, къырал жанындан себеплик болгъанын, конкуренциягъа чыдаяллыкъ производствола къуралгъанларын чертгенди, импортну жер-жерли продукция бла алышындырыу программаланы юслеринден айтханды.

Оюмларын республиканы Экономика айнытыу министерствосуну информация-аналитика жаны бла бёлюмюню башчысы Фатимат Абазова, эл мюлк министрни орунбасары Тимур Вадахов, промышленность, энергетика эм сатыу-алыу министрни орунбасары Эльдар Кяров билдиргендиле. 

Жыйылыуда эсгертилгенича, регионну Правительствосу 2022 жылны 19 августунда «Тыш къыралла эм халкъла аралы организацияла чекле кийирген болумлада Къабарты-Малкъарда импорт алышдырыугъа тийишли продукцияны тизмесин жарашдырыуну юсюнден» бегимни къабыл кёргенди. Андан тышында промышленный эм агропромышленный комплекслеге таплыкъгъа 25 проект толтурулады. Бюгюнлюкде Тырныауузда магъадан-вольфрам производствону жангыртырча инвестиция проект бардырылады, аны башламчысы «Элбрус тау магъадан комбинат» обществоду. Сора, «Севкаврентген» обществону бийик качестволу рентгенографияны бла флюорографияны ётдюрюрча производствону къурау жаны бла проектин тамамларгъа белгиленеди. Промышленностьха себепликге да мадарла этилгендиле. Юлгюге, «КъМР-ни гарантия фонду» бла «КъМР-де  гитче эм орта бизнесни субъектлерине микрокредитование фонд» бу жаны бла предпринимательство бла кюрешгенлеге займла бередиле.

Экономиканы айнытыу министерство 1 майдан башлап декабрьны ахырына дери ай сайын электрон халда «Файдагъа налог» низамгъа кирген физицеский лицолагъа бла энчи предпринимательлеге онлайн-акцияла къурайды. Грантла социал предприятиялагъа бла кеслерини проектлерин бардырып башлагъан жаш предпринимательлеге бериледиле, аланы ёлчемлери 100-500 мингнге жетеди. Ол ахчаны оборудованияны, техниканы алыугъа, лизинг келишимлеге неда связь ючюн тёлеулени жабаргъа хайырланыргъа жарайды.

«Телемеханика» общество «Шимал Кавказда Россетьле» бла чыгъарылгъан продукциясын регионда эм СКФО-ну субъектлеринде сатыуну юсюнден сёлешиуле бардырады, ол мурат бла сынауланы ётдюрюрча эсеплеу приборланы къаууму да хазыр этилгенди. Общество къыралда туризмни айнытыу миллет проектге да къатышады. «Терекалмаз» а тыш къыраллыладан артха къалмагъан продукцияны жарашдырады, ол Россейни компанияларында сынауланы ахшы да ётгенди. «Эрпак» общество крахмал заводну мурдорунда катион клейни этеди, аны республикадан тышында да алыргъа хазырдыла. Чегемни мияла заводу суу продукталаны сыйындырырча мияла орунланы жарашдырады, эндиге дери ол жумушлагъа «Тетрапаркны» продукциясы алынып тургъан эди. 

Ахшы жанына атламла агропромышленный комплексде да бардыла. Къырал статистиканы федерал службасыны управлениясыны эсеплерине кёре, 2022 жылда январьдан июльгъа дери 20,4 миллиард сом багъасы эл мюлк продукция хазыр этилгенди, ол а былтырдан иги да асламды. Бу жаны бла талай инвестиция проект да тамамланнганды. Бир кюн бла кечеге 30 тонна сют продукция жарашдыргъан жангы завод ишленнгенди, аны къурулушуна 110 миллион къоратылгъанды. «СКФО-ну 2025 жылгъа дери айныуу» программаны чегинде «Селекция-урлукъ араны къурау» проект да ахырына жетдирилгенди, аны багъасы 569,58 миллион болгъанды. Тирликни бузмай тутарча жангы хранилищеле хайырланыугъа берилгендиле. Чегем районда «Парник» теплица комплекси ишленип башланнганды.

Адамланы качестволу продукция бла жалчытыугъа къыралны жанындан да болушлукъ уллу себеплик этеди. Кемчиликлени юслеринден айтханда, тыш къыралладан келтирилген компонентлеге багъала терк эм уллу ёлчемледе ёсгенини хатасындан производительлени талайына кеслерини продукцияларыны багъасын да кёбейтирге тюшгенди, ол а адамланы жанындан алагъа сурамны азайтханды.

Жыйылыуну эсеплерине кёре, сейирлери болгъан органлагъа бла организациялагъа эсгертиуле этилгендиле, деп билдиредиле Жамауат палатаны пресс-службасындан.