Тиширыула, ариу болабыз деп, сыфатларын нек бузадыла?

 Шёндюгю дунияда тиширыула кеслерини сыфатларын тюрлендирир ючюн этмеген амаллары къалмайды. Бирде ариу кёрюнебиз деп сыфатларын бузадыла, башхала аланы сёгерча сылтау бередиле.  Социал соруулагъа, психологла бла кенгешлеге  кёре,  Россейни интернет-порталларындан бири къызланы сыфатларында эр кишиле не затны жаратмагъанларын ачыкълагъанды. Ала быладыла: 

1. Чачда лакны кёплюгю

Чачха аслам лак неда гель жагъып жыйылгъан къыйын, тюрлю-мюрлю причёскала карнавалгъа, подиумгъа, фотосессиягъа келише болурла. Бир сёз бла айтханда, къыз узакъдан кёрюнюрюк жерледе. Алай харкюнлюк жашауда, жууугъуракъ тюбешиуледе чачыгъыз табийгъатдан келген халда болсун. Аллайлагъа къолунг бла тийген окъуна хычыуунду.

2. Бетине  штукатурка жагъылгъанча

 Тональный кремле бла пудрала тиширыуну бетинде гитче кемчиликчиклени букъдурургъа деп этиледиле. Ала марда бла жагъылсала, бет сыйдамча,  саулукълуча кёрюнеди. Аны бла бирге крем кеси эсленмезге керекди, тиширыу аны бла хайырланнганы да жашырынлай къалса игиди. Алай бир-бирле уа, аны чексиз сюртюп, бузуп къоядыла. Аллайланы юсюнден: «Къарагъыз, бу штукатуркагъа», - дейдиле.

3. Жылтырауукъ кёз башла

Сиз макияжны кёп тюрлюлюгюн кёргюзтген профессиональный модель тюйюл эсегиз, жылтырауукълары бла тенилеге угъай дерге керексиз. Эр кишилени кёбюсю аланы бёгекликге бла адепсизликге санайды.  Аллай кёз  къабакълары бла эшикге чыкъгъан къыз жансыз манекеннге ушап къалады.

4. Бирге жабышхан кирпикле

Тиширыула, кёзлерин ачыгъыракъ кёргюзтюр умут бла, тушну хайырланып, кирпиклерин узунуракъ этерге кюрешедиле. Алай аны качествосу иги болмаса, кирпиклени  бирге жабышдырады. Ол а тиширыуну тизгинсизлигини белгисича, аны сыфатын учузландырады.

5. Къолтукъ тюплерини тапсыз халлары

Къолтукъ къууушла - тиширыуну саны-чархында табийгъатдан берилген халларында турургъа жарамагъан жерлеринден бирине саналадыла.  Соруула кёргюзтедиле: эр кишилени кёбюсю жюлюнмеген къолтукъланы сюедиле деп оюмлагъан къызла терсдиле. Къалай-алай болса да, адам улуну къарыулу бёлюмюне саналгъанла низамлы тиширыуланы излейдиле, ала гигиена жаны бла да тазаракъ сунадыла.

6. Тюклю бутла

Былайда экили оюм болургъа ахырысы бла да амал жокъду - бутларыгъызда тюклени къурутугъуз. Жюлюгюз неда эпилятор бла хайырланыгъыз. Алай болмагъан аякъла  эр кишилени кёллерин сууутадыла.

Къытайда уа «тюклю» чындайла чыгъаргъандыла. Аланы кийген тиширыуланы  бутлары  тюкле ёсгенлеге ушап, аны тыш сыфатын бузадыла. Нек? Кечеги электричкада барыргъа тюшсе, зорлукъчула кёз къаратмазча.

7. Терисини къургъакълыгъы

Эр кишилеге къол аязлары бла тийгенде сезим бек магъаналыды. Тиширыуну териси къургъакъ, табанлары бла жингириклери зыбыр болсала, ол зауукълукъ табылынмайды. Бусагъатда нени да жумушатхан кремле, башха затла да топпа-толудула. Тиширыула алагъа уллу кёллю болмазгъа керекдиле.

8. Тишлени халы

Тишлеригиз сары нек болгъанын, ауузугъузда аман ийисни сылтауун да ангыларгъа кюрешигиз. Тютюнмю ичесиз? Неда кофе? Огъесе къызыл чагъырмы? Чай да аланы акълыкъларына себеплик этмейди. Аны бла бирге тишлеригизни хар кюнден жуумай эсегиз а… Бу затлагъа тюшюннген эсегиз, аланы болжалгъа салмай къурутургъа кюрешигиз.

9. Эринлени тапсыз ызлау

Тиширыу эринлерини чеклерин тюз ызлаялмагъаны кёбюсюнде ресторанча жерледе шарт эсленеди.

Бола тургъан халатла - чекледен чыгъып ызлагъан неда къаралдым контраст карандашны хайырланнган. Тиширыула былай боясала, эринлери толуракъ кёрюннгенча сунадыла. Хау, алгъа алада помада сакъланнган къадарда, алайды. Болсада, ол кетгенден сора ауузну тёгерегинде жаланда ызланнган чекле къалсала, кюлкюлю кёрюнеди. Тюз да клоундача.

Специалистле быллай акъыл юйретедиле: рестораннга кавалеригиз бла тебирей эсегиз, эринлеригизге жууукъ тюрсюнлю помаданы хайырланыгъыз.

10. Духланы мардадан оздуруу

Кёп эр киши дух ийислери асыры бек ургъан тиширыуланы ангылаялмайды, аллайлагъа тёзюп да туралмайды.  Ол аны женгил ариу ийис бла кёллендирир, таукеллендирир орунуна, къусарыгъын келтирирге боллукъду. Алай бла эркегырыу жууугъуракъ танышыргъа сюйген тиширыуундан кёлю къачып, аны юсюнден оюмун  ахырысы бла да тюрлендирип къоярыкъды.

11. Терисине тюрсюнлю суратла салдырыу

Жууукъдан татуировкала, бютюнда ала тюрсюнлюле болсала, бирде ариу окъуна кёрюнедиле. Алай эр киши тиширыудан бир он метр узакълыкъда турса, аны жалан этинде татуировкасы болгъанын ангыламай къалыргъа болады. Арлагъыракъдан ол сурат тери аурууну бир тюрлюсюне ушайды, чапырыугъа неда темсиреуге. Ол а къоркъутурча болумду.

12. Башхаланы къатларында кесин жасау

Адамла арасында бетигизни боягъан тап кёрюнмейди. Бегирек да эр кишиле болгъан жерде. Тиширыула ариууракъ кёрюнюрча къаллай бир заман эм къарыу къоратханларын ачыкъ этмезге керекдиле.  Ансы эркегырыу кесин алдатхан сунуп тебирерикди.

 

Юсюпланы Галина хазырлагъанды.
Поделиться: