Эл мюлк техниканы иги билгенлени белгилегендиле

Къабарты-Малкъар къырал аграр университетни «Эл мюлкню механизациясы» факультетинде олимпиада ётгенди. Анга къатышхан студентле эл мюлк техниканы нечик иги билгенлерин кёргюзтгендиле.

Университетде бу эришиулени инженер-механикни кюнюне атап бардыргъан эдиле. Анга ол факультетни «Агроинженерия» бёлюмюнде окъугъанла къатышхандыла. Аланы билимлерине багъа берген жюрини къауумуна уа вузну преподавательлери киргендиле.

Алай бла биринчи жерге «Механизатор» къауум (Сулиев Зуфар, Бляшев Тамерлан, Гызыланы Адам) тийишли болгъандыла. «Тирлик» къауум (Темукуланы Алим, Тхегазитов Адам, Казанчев Кантемир эмда Гайыланы Ислам) экинчи жерни  алгъандыла. Башийланы Аслан, Сижажев Аскер, Ойтов Азамат эмда Хамуков Ахмет а «Нива» къауумну санында ючюнчю жерге чыкъгъандыла.

Энчи конкурсда тёртюнчю курсну окъуучусу Зуфар Сулиев «Ростсельмаш» компанияны техникасын иги билгени себепли грамотагъа тийишли болгъанды. Хорламгъа итиннгени ючюн Азамат Ойтовну да белгилегендиле. Усталыкъда эм билимлини ачыкълагъанда уа Казанчев Ратмирни биринчи этгендиле.

Саулай айтханда, жашла бары да бизни эмда тыш къыраллада чыгъарылгъан эл мюлк техниканы бек иги билгенлерин кёргюзтгендиле.

 

Улбашланы Мурат хазырлагъанды.
Поделиться: