Товарны багъасы юсюнде жазылгъандан башха эсе

Адам тюкенде абери алып, кассагъа келгенде уа аны багъасы юсюнде жазылгъандан башха болгъанын кёрсе, не зат этерге керекди? Аны юсюнден Роскачествону гражданла эмда организацияла бла ишлеген бёлюмюню башчысы Елена Карпенко былай айтханды:

- Быллай затха тюбеген алыучулагъа тюкенледе асламысында «жангы багъаланы жазаргъа унутуп къойгъанбыз» дейдиле. Аллындан окъуна айтып къояйым, алыучу  товарны юсюнден хар нени, ол санда багъасын да билирге эркинлиги барды. Юсюнде не багъа жазылып эсе да, тюкен алыучугъа, ма аллай бир тёле да ал дейди. Ол а анга кёре оноу этеди.

Алай кассагъа жетип, андан башха ахча излегенлерин эшитсе уа, товарны ол биринчи багъасын тёлерге эркинди. Анга угъай деселе, ол да аны алмай кетерге боллукъду.

Алай тёлеп чыкъгъандан сора кёрсе уа башхалыкъны, артха кассагъа къайтып, ол алай нек болгъанын билирге онгу барды. Керек эсе алайгъа администраторну да чакъырыргъа боллукъду.

Адамны жумушуна тийишлисича къарап, ыразы этмей къойсала, ол аны юсюнден алыучуланы оюмларыны китабына жазаргъа керекди. Ызы бла дау къагъыт жарашдырып, ол тюкеннге почта бла жиберирге. Тюкен аланы барына да кёз-къаш бермей къойса уа алыучу сюдге барыргъа эркинди.

 

Улбашланы Мурат хазырлагъанды.
Поделиться: