Ахчаны жюрютюуню юсюнден жаш тёлюде иги ангылаулары болурча

Бу кюнледе Железноводск шахарда «Шимал Кавказ федерал округда финанс окъуулулукъну кючлендириу: айнытыу онгла, борчла эмда перспективала» деген конференция ётгенди. Аны Россей Федерацияны Финансла министерствосу, Россейни Банкы эмда Ставрополь крайны Правительствосу къурагъандыла. Аны ишине КъМР-ни финансла министрини орунбасары Темиркан Баждугов да къатышханды, деп билдиргендиле министерствону пресс-службасындан.

Конференцияны кезиуюнде кёп тюрлю финанс институтланы эмда организацияланы келечилери СКФО-да финанс окъуулулукъ бла байламлы проектлерин къалай тамамлагъанларыны юсюнден хапарлагъандыла. Бу жаны бла ахшы сынамны, Россейни Банкыны финанс жарыкъландырыу бла байламлы оюмларын къалай хайырлана баргъанларын да туура этгендиле. Дагъыда регионланы тийишли программаларын сюзгендиле, аланы тамамлагъанда къаллай чурумлагъа тюберге тюшгенини юсюнден да сёлешгендиле. Финансла жаны бла саулукълу жашау этерге кёллендириу, педагогланы юйретиу – бу темалагъа да энчи кёзден къарагъандыла.

Бизде «Къабарты-Малкъар Республикада жашагъанланы финанс окъуулулукъларын 2020-2023 жылланы чеклеринде кючлендириу» деген программа бардырылады. Анга тийишлиликде орта билим берген 39 учрежденияда жаш адамланы финансла жаны бла окъуулулукъларын кючлендирген программала хайырланыладыла. Бу эмда предпринимательство темалагъа аталып олимпиадала да ётюучюдюле.

Бийик билим бериу жаны бла къырал стандартлагъа «Экономикалы культура, ол санда финанс окъуулулукъ да» деген компетенция сингдирилгенди. Аны хайырындан студентле эмда вузланы тауусханла тюрлю-тюрлю жашау болумлада экономикалы оноуларын тынгылы ойлап алай эталлыкъдыла.

Аны юсюне Пенсия фондну Къабарты-Малкъарда бёлюмю да жыл сайын информациялы-ангылатыу ишин бардырады. Ол жаш тёлюде пенсияла, финансла, сора дагъыда социал жумушла жаны бла окъуулулукъну кючлендириу бла байламлыды.

Республикада орта школла, техникумла, колледжле да Россейни Банкы финанс окъуулулукъну юсюнден бардыргъан онлайн-дерслеге тири къатышыучудула.