Аллергия ауруулагъа багъыуда шёндюгю амалланы сезгендиле

Бу кюнледе Нальчикде Аллергологланы бла  клиникалы иммунологланы ассоциациясыны 20-жыллыкъ юбилейине жораланнган илму- практика конференция ётгенди. Аны ишине медицинаны бу сферасында ишлеген жюзден артыкъ специалист къатышханды. Ала бери Москва, Санкт-Петербург, Дондагъы Ростов шахарладан, Ставрополь крайдан, Ингуш, Чечен эм Шимал Осетия-Алания республикаладан келгендиле.

КъМР-ни Саулукъ  сакълау министерствосуну пресс-службасындан билдиргенлерине кёре, конференцияны бардырыуну баш мураты врачланы бла илму къуллукъчуланы усталыкъларын ёсдюрюуге себеплик этиудю.

Форумну  ача, КъМР-ни саулукъ сакълау министрини орунбасары Заур Батыров  былай айтханды.

- Конференцияда усталыкъны ёсдюрюуге  энчи эс бёлюннгенин мен бек игиге санайма.  Дагъыда  къыйын саусузлагъа къалай багъаргъа  боллугъуна энчи магъана бергенигиз аламат шартды. Быллай форумлагъа къатышыу а, сёзсюз, бек  хайырлыды. Специалист кёп жангы амалла бла шагъырей болады. Бизни республикада угъай да, саулай  Совет Союзда окъуна  биринчи аллергологиялы кабинетни къурагъан  бизни жерлешибиз профессор, РФ-ни сыйлы врачы Хутуланы Светлана болгъанды. Биз аны бла ёхтемленебиз эм ыразылыгъыбызны билдиребиз.

Илму конференцияны Къабарты-Малкъарда ётдюрюуню  баш сылтауларындан бири уа аллергология служба СССР-да биринчи мында къуралгъаныды  эм бу сферада билимли специалистле да болгъанларыды. Бюгюнлюкде араны 120 ундуругъу  барды. Кеси да бир ненча структурагъа бёлюнюпдю. Анда сабийлеге бла абаданлагъа реабилитацияны бардыргъан бёлюм да ишлейди.  Минги тауну этеклеринде  аламат  хауасы бла  солуп, саулукъларын игилендирирге  бир ызгъа 30 адамны онглары барды. Дагъыда анда 2020 жылдан бери ковидден ауруп къыйналгъанла да реабилитацияны ётедиле. Аллергологияны бла иммунологияны арасы КъМКъУ-ну медицина факультетини клиникалы базасыча ишлейди. Тюрлю-тюрлю илму  тинтиуле бардырыргъа эркинлик берген лицензиясы да барды, медицина учрежданияланы федерал реестрине киреди. Арада бардырылгъан илму тинтиулени эсеплери Россейде чыкъгъан белгили журналлада басмаланадыла эм онлайн конференциялада сюзюледиле.

Россейни медико-биологиялы  федерал агентствосуну Иммунология институтуну таматасы Наталья Ильинаны оюмуна кёре, Къабарты-Малкъарны аллергология службасы къыралыбызда бек кючлюледен бириди.

- Хар бери келгенибизде биз кесибиз да бир жангы амаллагъа юйренмей кетмейбиз. Мында бу ыз бла  кюн сайын тохтамай ишлегенлей турадыла, - деп чертгенди профессор.

Докладла этген  врачла аурууланы тохташдырыуну амаллары бла чекленип  къалмай, алагъа генно-инженер амалланы хайырлана жарашдырылгъан дарманланы юслеринден да айтхандыла. Форумда бронхалы астма, аллергиялы ринит, аллергодерматоз дегенча эм башха аурууланы  тюз тохташдырып, алагъа тийишлисича багъыуну юсюнден сёлешиннгенди. Аллай саусузланы дарманла бла жалчытыу Къабарты-Малкъарда тыйгъычсыз бардырылгъаны  да белгиленнгенди. Сёз ючюн, 2021 жылда генно-инженер  биологиялы  препаратланы 556 упаковкасы  алыннганды, ол санда багъалы дарманладан да 91. Алагъа республикалы бюджетден 7 миллион 446 минг сом бёлюннгенини юсюнден кесини докладында  Хутуланы Светлана билдиргенди.

Форумну программасыны чеклеринде Аллергологланы бла  клиникалы иммунологланы ассоциациясыны келечилери лекцияла окъугъандыла.