Энди жол жангы мардалагъа келишеди

Бу кюнледе  «Регион, муниципал эм жер-жерли  магъаналы автомобиль жолланы игилендириу» федерал программаны чеклеринде «Майский – Октябрьский» жолну 5,09 километр чакълы бирин мардалагъа келиширча этгендиле.  Аны юсюнден бизге  КъМР-ни Транспорт эм жол мюлк министерствосундан билдиргендиле.

Ишлени кезиуюнде специалистле жолну мурдорун кючлегендиле, жангыдан асфальт жайгъандыла, машинала сюелирча  жерле, тротуарла, улоу тохтагъан комплексле эм башха затла да  ишленнгендиле.

Ремонт баргъан кезиуде машиналагъа чырмау чыкъмазча мадар да этилгенди.  Ол санда белгиле, ызла эм темир буруула да тартылгъандыла. Бу кюнледе ишчи комиссия этилген ишле ГОСТ-ну излемлерине келишгенлерин да белгилегенди.    
Эсге сала айтсакъ, сагъынылгъан учатокга он жыл мындан алгъа къаралгъанды, аны себепли ол иги да тозурагъан эди.  Бусагъатда уа  ол жангы излемлеге келиширча болгъанды. Тынгылы ремонт жангы технологияланы эм  качестволу материалланы хайырланып  бардырылгъаны уа бютюн къууандырады.