Сансызлыкъны хатасы терслиги болмагъаннга жетгенди

РФ-ни МВД-сыны Урван районда бёлюмюню патруль-пост службасыны къуллукъчусу быйыл 10 февральда Россейни Административ кодексини 20.20-чы статьясыны 1-чи кесегине бузукълукъ этилген инсанны  ачыкълагъанды. Башхача айтханда, бир эр киши жамауат жыйылгъан жерде аракъы иче  болгъанды.  

Полициячы  ишчи жорукъларына, Административ кодексге бузукълукъ этгенди. Ол административ бегим жарашдырылгъан кезиуде инсанны аты, тукъуму шарт тохташдырылыргъа кереклисин биле тургъанлай,  документлени инсанны сёзлерине кёре  толтургъанды. Ол а жалгъан шартланы билдиргенди. Алай бла право низамны сакълаучусу борчларын тийишлисича  толтурмагъаныны хатасындан терслиги болмагъан инсан жууапха тартылгъанды. 

Аны бла байламлы РФ-ни СК-сыны КъМР-де следствие управлениясыны къуллукъчулары право низамны сакълаугъа РФ-ни УК-сыны 293-чю статьясыны 1-чи кесегине кёре терслеу материалла хазырлагъандыла. Ол ишчи борчларын ат башындан толтургъаны ючюн жууапха тартыллыкъды. Уголовный иш тинтилип, сюдню къараууна берилгенди.

КъМР-де Ич ишле министерстводан бизге билдиргенлерича, бу иш бла байламлы тинтиуле бардырылгъандыла. Бузукълукъну болдургъан полициячы эмда аны таматасы дисциплина жууапха  тартылгъандыла. «Сюд чыгъаргъан оноугъа кёре, полициячыны мындан ары ич ишле органлада  къуллукъ этиуюню юсюнден соруу сюзюллюкдю»,-деп билдиргендиле ведомстводан.

Тикаланы Фатима хазырлагъанды.
Поделиться: