Излеуню эмда жашырынлыкълагъа тюшюнюуню жолунда

Республикабызда Къабарты-Малкъар къырал университетни мурдорунда къуралгъан хунерли сабийле жюрюген лицей ачылгъан кезиуде аны биринчи болуп тауусханладанды Сардиянланы Азамат. Ары тюшер ючюн а, аслам предмет олимпиададан ётерге керек эди. Нальчикни бир-бир дерслени терен халда окъутхан тогъузунчу номерли школундан келгенди ол бери.

Юйде сагъынылгъан лицейни юсюнден билгенлеринде, ата-ана да ёсдюргенлерини билимине ышаннгандыла. Энди ачылгъан жангы окъутуу махкемеде билим алса уа, ол уллу жашауну кенг жолуна чыкъгъан кезиуюнде апчымазлыгъына да ийнаннгандыла. Анча заман озгъандан сора, бюгюнлюкде алып айтханда, ышаныулукълары аланы алдамагъанын да белгилерчады.

Лицейде окъуй тургъан кезиуюнде да ол, алчыланы сатырында болуп, устазларын къууандыргъанлай тургъанды. Биологиядан олимпиадалагъа къатыша, къырал даражада экинчи жерге да чыкъгъанды. Бу жаны бла уа устазы Лариса Петровнагъа энчи ыспас этеди. ЕГЭ-леде саулай да 256 балл алып, майдалгъа тийишли болгъанын бютюнда ачыкълайды. Химиядан кёрюмдюсю уа – 89 балл – ол кезиуде республикада бийик эсепге саналгъанды. Азаматны усталыкъ сайлаууну юсюнден айтхан заманда уа, ол кеси: «Анам врачды сора уа, мен аны ишине, садигиме да бирча жюрюгенме», – деп кюледи. Алгъадан айтсакъ, бюгюнлюкде таулу жаш Санкт-Петербургда къыркъынчы номерли больницаны терапевтиди. Бу ызда уруннган врачлагъа уа саулукъ сакълауну хар бёлюмюнден да терен билим керек болады.

Ары дери уа ол лицейни тауусханындан сора, КъМКъУ-ну медицина факультетини тишлеге багъыугъа тюшюндюрген бёлюмюне киреди.

Аны экинчи курсунда окъуй тургъан кезиуюнде айырмалы студент болгъаны себепли, халкъла аралы жаш тёлю медицина конгрессге къатышырыкъланы тизмесине тюшеди. Алай бла, гипертензияны юсюнден тынгылы доклад хазырлап, огъарыда сагъынылгъан уллу шахарларыбызда орналгъан академик И. Павлов атлы биринчи къырал медицина университетде къуралгъан конгрессге барады. Ол кюнден башлаб а аны окъуууна-билимине къарамы бютюнда кючленеди.

Барып, кёрюп келген университетде хар не да къалай къуралгъанын жаратып, ары кёчерге кёлленеди. Муратына жетип, экинчи курсдан сора анда окъуп башлайды. Вузну ючюнчю курсунда болгъанында уа бюгюнлюкде ишлеп тургъан больницасына медбрат болуп келеди. Беш жылны ичинде реанимация бёлюмде къыйналгъанлагъа къарап тургъанды.

Дуния пандемия болумлагъа тюшгенинде, бу медицина махкемеде коронавирусдан ауругъанлагъа деп госпиталь ачылады. Биринчи кюнден башлап, эки жыл чакълы заманны Азамат да мында «къызыл тийреде», амалсызлагъа эс тапдыра, къужур ауруугъа къажау сюелгенледен бириди.

Алай ишлей, окъууун да  бардыргъан тынч болмагъанлыкъгъа, тауусхан вузунда ординатураны да ётгенди. Билими-окъуулулугъу, саусузлагъа жандауурлугъу, ишин сюйгени бла чекленмей, аны, не жаны бла да эбин билген жаш адамны, больницаны администрациясы, ыразы болуп, кеслеринде терапевт врачны къуллугъунда къояды.

Кертиди, урунуу жолунда ол алыкъа алай узакъ заманны тюйюл эсе да, аллына болушлукъ, себеплик излеп келгенледен ыспас табады. Айхайда, аллай уллу шахарда жашагъанланы, бирси тюрлю жашау мардалагъа юйреннгенлени сурамлары да башхаракъ болурла. Алай эсе да, сюйген иши бла кюреше, Сардиян улу аланы къайсы  бирини да кёлюн ала биледи.

Аны бош заманы алай кёп къалмай эсе да, жюзерге, спорт жараулагъа да жюрюйдю. Китап  неда журнал окъуса уа, алада усталыгъы бла байламлы темаланы сайлайды. Алай бла сабийлигинден да жаратхан  Михаил Булгаковну «Записки юного  врача», «Мастер и Маргарита», «Собачье сердце» эмда бирси чыгъармалары анга бюгюнлюкде да философиялары, адам эмда врач кёз къарамны ышанлары жаны бла сейир болгъанлай, аслам соруугъа жууап излетгенлей къаладыла.

Огъарыда Азаматны анасы врач болгъаны сагъынылгъанды. Ол республикабыздан тышында да кенг белгили врач-анестезиологубуз, КъМР-ни сыйлы врачы  Геккиланы Жаннетни бла инженер-технолог Сардиаянланы Ибрагимни ариу юйюрлеринде ёсгенди. Кертиди, хурметге, юлгюге да тийишли тиширыуну ишине къалай берилгенин кёре, аны ызы бла бара, ол медицинаны сайлагъаны жаланда аны ючюн угъай, бу жолну кесини сыйлы борчунча сезгенин окъууу бла, энди бюгюнлюкде усталыгъы бла да ачыкълай келеди.

Кеси айтханыча, ол алыкъа сынам жыйышдырыуну, башын ёрге кётюрмей, излеуню, жашырынлыкълагъа тюшюнюуню жолундады. Ахшы муратларына жетер ючюн, бюгюнлюкде врач къадарында билимли болур ючюн, да ингилиз тилни бютюнда терен билирге излеп, аны жазыуда, сёлешиуде да чырмаусуз, шатык хайырланыу  бла да кюрешеди. Нек дегенде, жаланда доктор болуп къалмай, ишинде хайырланнган амалларын, мадарларын эмда аланы себепликлери бла болдургъан эсеплерин къагъытха тюшюрюр, медицина илмуда да ахшы ыз къояр умуту барды.