Энди аллай къыйынлыкъ къайтарылмаз ючюн унутмазгъа

2005 жылны онючюнчю октябри – къайгъылы, къужур кюн кёплени жерге къаратханды, жюреклерин къозгъагъанды, сагъыш этдиргенди. Бюгюнлюкде да, андан бери талай жыл озгъанда да, аны  эсгергенде чач тюклерибиз ёрге  къобадыла.

Сёзсюз, къыйынды аллайны унутхан, бютюнда урушдача атышыуну, жигитча сермешген нёгерлерини да ёлгенлерин кёрген адамгъа. Аны юсюнден  ол жыллада КъМР-де МВД-ны ГИБДД-сыны таматасыны орунбасары, бусагъатда  Черек районну Бабугент элиндеги Деппуланы Хакимни атын жюрютген кадет школ-интернатны директору  Эристауланы Адырахман бла  ушакъ этгенимде: «Ол  кюнлени энтта да тюшюмде кёрюп титирейме»,-дегенди. Ол 13-чю октябрни, андан сора эки кюнню  юсюнден да манга хапар айта, терк-терк тохтап, тынгылайды.

Эрттенликде сагъат алты да болгъунчу телефон таууш эшитиледи. Ол, башха кюнледеча болмай, манга ачы зынгырдагъанча кёрюннгенди. Адырахманны излейдиле.  Ол юй бийчесине: «Мени ишге чакъырадыла, барайым»,- деп терк окъуна, милиция кийимле кийип, машинасына ашыгъып олтуруп, кетеди.

Элде къымылдагъан адам а жокъ эди. Эрттенлик шошлукъну автомат атдыргъан  тауушла бузадыла. Алыкъа  киши да не болгъанын да билмейдиле. Адырахманнга: «Долинскеде «Ландыш» терек  бахча обществону къатына жет»,- дейдиле. Бир кесекден рация бла право сакълаучу органлагъа чабыуллукъ этилгенин билдиредиле эмда анга, управлениягъа келип, къоруулауну къураргъа кереклисин айтадыла. 

-Бандитле ич ишлени 1-чи, 2-чи, 3-чю бёлюмлерине, УИН-нге, дагъыда  башха право сакълаучу органлагъа чабыууллукъ этгенлерин рация бла эшитип тургъанма,-деп эсгереди Адырахман. –Управлениягъа келир ючюн а,  экинчи промпроездге  темир жолну юсю бла энишге Шогенцуков атлы орам бла тебирейме.

Алайда автомат тауушланы эшитип, юч нёгерим бла Ленин атлы проспектде Къоркъуусузлукъну федеральный службасы орналгъан жерге  келебиз. Машина ётер онг жокъ эди, бир да къазауатха киребиз. «Подарки» тюкенде бандитле тутхан жетеуленни къутхарыргъа болушабыз.

Алайда, майданда, солдатладан бири ёледи, бири да ауур жаралы болады. Аланы бир жанына алып, тийишли мадарла этерге керек эди. Автоматладан асыры атдыргъандан, кёз  ачып къарыу жокъ эди. Бронированный машина да баралмайды аскерчилени къатына. Бир  кесекден а  Адырахманны башчылыгъында аны  амалын да табадыла.

Ол тийреде болгъан предприятиялада, организациялада ишлеген инсанланы  къоркъуусуз жерге кёчюредиле. Майданда ушкок атылгъан тауушла тохтагъандан сора, Адырахман больницалагъа барып, жаралы  болгъан  милиционерлерине къайгъыргъанды, юйлерине, юйдегилерине сёлешип жашларындан хапар  билдиргенди. Ингир къарангысына уа ГИБДД-ны управлениясына жетгенди.

-Ол кюн управленияда ишлегенле, инспекторла да мында эдиле,-дейди Эристау улу. –Кёбюсю, солууда болгъанларына, ауругъанларына да къарамай, жетгендиле бери. Аланы бир киши да чакъырмагъан эди. Не этейик, къайры барайыкъ, не бла болушайыкъ, дей эдиле.

Ленин атлы проспект эм Осетинская орам бирге къошулгъан жерде  уа быллай иш болгъанды. Бандитлени женгил машиналары бузулуп, жерлеринден тепдиралмай тургъанлай, алайгъа «Газель» келип тохтайды.

Аманлыкъчыла, олсагъат кеслерини машиналарын къоюп: «Жашаргъа сюе эсенг, машинангдан чыгъып кет» деп, аны иесини кёкюрегине автоматны тирейдиле. Ол а, машинасын жеринден тепдиралмазча этип, къолларын кётюрюп, чыгъып кетеди. Малгъунла алайда кёпге мычыйдыла. «Газельни» иеси уа алайдан узакъ болмай сюелген эки инспекторгъа ишни болушун айтады. Жашла, жашауларына  къоркъуу тюше тургъанлай, ары чабадыла.  Алайда бандитлени ючюсюн да  ёлтюрюп, бирин да саулай тутадыла.

-Быллай юлгюлени дагъыда кёп келтирирге боллукъду. Ол кюнледе бир адам да кесини жашаууну юсюнден сагъыш этмегенди деп мен таукел айтыргъа боллукъма.   ГАИ-де  ишлегенле ол кюн гражданлагъа бек кючлю болушлукъ этгендиле,- дейди Адырахман.

Ол «тревога» бла ишге кетгенден сора Долинскде, Нальчикде да уруш бара тургъан кезиуде  аны эки жашы Руслан бла Аслан окъургъа кетедиле. Связь байламлыкъ болмагъаны себепли аладан хапар билмегенди, тюзюн айтсакъ, ол  къазауатда ала аны эсине да келмеген эдиле. Артда, нёгерлерине тилеп, ала жашларын табып, юйюне ашыргъан хапарлары бар эди.

Адырахман кеси уа, юч сутканы ичинде  юйюне бармай, управленияда  тургъанды. Ала экинчи, ючюнчю кюнледе да болумну сюзгендиле, ким къаллай  болумгъа  тюшгенини юсюнден бир бирге билдиргендиле. Ала бла болгъан ишни сюзгендиле, тинтгендиле.

Жашаугъа къоркъуу тюшген заманлада милицияны полковниги аны юсюнден сагъыт этмегенди. Ушкок окъ келип анга да тиерге боллугъун эсине да  алмагъанды. Алай  Аллах  сакълагъанды аны, юч жашын бла къызын ёксюз этмегенди, юйдегисине, эгечлерине, къарындашларына къара кийдирмегенди.

Юйюнден Адырахман жангы «Жигули» бла чыгъып кетген эди. Аны Хасаниягъа кирген жерде постда къоюп, кеси уа  БТР-ге кёчген эди да, экинчи кюн машинасын келтиргенлеринде, ол окъладан элек болуп тура эди. Аны  жууукълары машинаны  юсюнден чырт да сагъынмайдыла «Кеси сау къалды эсе, андан уллу саугъа, ырысхы да бизге къайда»,-дейдиле.

Республикабыз гитчеди. Мында жашагъанла хазна къалмай бир бирибизни таныйбыз. Бир кюн болмаса да башха кюн тюбешебиз. Бир бирге жууукъ  болмагъан да хазна жокъду. 13-чю  октябрьде къарындаш къарындашха , жууукъ жууукъгъа, тенг тенгнге чабыуллукъ этгенди. Ол а бек  осалды, уллу къыйынлыкъды. Бютюнда бег а  ырахат, тынч заманда. Аны  себепли  бюгюннгю мамыр, жарыкъ кюнюбюзню, жулдузлу кёгюбюзню сакъларгъа борчлубуз.

Этген кишилиги ючюн Эристауланы Адырахман  Россейде Лермонтов атлы комитетни «За личный  вклад в укрепление мира и согласия на Кавказе» деген  кюмюш майдалына эмда Къабарты-Малкъар Республикада Ич ишле министрни сыйлы грамотасына тийишли болгъанды.

Холаланы Марзият.
Поделиться: