Кёл салып окъуй, муратына да жетеди

Бюгюнлюкде, билим бериуню качествосу бютюн суралгъан кезиуде, орус тилден бла литературадан окъутханланы жууаплылыкълары бютюн аслам болгъанча кёрюнеди. Нек дегенде бу дерсден Бир къырал экзаменлеге мектеплени бошагъанла барысы да борчлу халда къатышханларын билебиз.

Быйыл школланы тауусханланы тогъузунчу классда болгъан кезиулери пандемия башланнган заманнга тюшгенин да эсигизге салайыкъ. Окъуучула ол заманда билимни дистанциялы халда алыргъа кюрешгенлерин да. Аны сагъыннганыбыз а экспертле мектеплени бу выпускларына сынауланы бериу тынч болмагъанын, аланы алгъадан ОГЭ-лени берип, экзамен къалай жазыллыгъы бла сынамлары жокълугъун чертгенлери эмда аны алайлыгъы жашлагъа бла къызлагъа къыйын болгъанын айтханлары бла байламлыды. Аны ючюн а аланы жетишимлери бизге бюгюнлюкде бютюнда багъалыдыла.

Къыралыбызда школланы бошагъанла экзаменлени ЕГЭ халда берип келгенли да орус литературадан сынау, тарыхдан окъуна эсе да, эм къыйыннга саналып келеди. Алай эсе да, бизни устазларыбыз, жаш тёлюбюз да, бу жаны бла ахшы жетишимле болдура, билимлиликлерин, окъуулулукъларын да ачыкълайдыла.

Быйыл окъуучулары жюз балла алгъанланы санында орус тилден окъутханла Жолабланы Мадина (Яникойну школу), Ностуланы Сакинат (Нальчикни тогъузунчу номерли бир-бир предметлени терен окъутхан мектеби), Байдаланы Раиса (Нальчикни онжетинчи школу) бардыла.  Дагъыда Тырныауузну бешинчи номерли гимназиясыны орус тилден бла литературадан устазы Хаджиланы Халиматны ишин белгилерчады. Нек дегенде ол окъутхан сабийледен бири да репетиторгъа бармай, алай бергендиле ЕГЭ-лени.

Алай эсе да, эсеплери уа къууанырчадыла. Он чакълы окъуучу 94-98 балла алгъандыла. Бу кёрюмдю кеси ачыкълап турады аны къалай ишлегенин.

Окъуучуларындан бири, Жанатайланы Азинат а, орус тилден сынаудан 94 баллгъа тийишли болгъанды. Алай эсе да, биз а къызчыкъны литературадан эсебин энчирек чертирге излейбиз. Нек дегенде ол къыйыннга саналгъанын огъарыда белгилегенбиз. Алайды да, бу предметден ол 98 балл алгъанды.

Былайда дагъыда бир затны чертсек, сёз ючюн, сабийлени ишлерине бирси регионлада къаралгъанын, къызчыкъны быллай жетишимине къууанырчады. Ол кеси уа устазы Хаджиланы Халиматха ыспас этеди. Аны хар ыйыкъдан сынау иш берип, аланы эсеплерин а къабыргъада кеси жарашдыргъан таблицагъа жазып тургъанын айтады.

Алай бла уа окъуучула ЕГЭ-де ненча балл алыргъа боллукъларын кёрюп тургъандыла, аны бла бирге уа жиберген халатлары бла байламлы ишлерге, алагъа эс бурургъа кереклисин да ангылагъандыла. Сынамлы устазны быллай амалы, башламчылыгъы да хайыр бергенин а эсепле ачыкълагъанларын кёребиз.

Азинатны уа Москваны къырал университетини филология факультетини бюджет бёлюмюне окъуугъа киргени бютюнда къууандырады. Аллай жаш тёлюбюзню барлыгъы кёллендирмей къоймайды.

Къызчыкъ быйыл, былтыр да малкъар тилден район даражалы олимпиадада биринчи жерге тийишли болгъанды. Жетинчи классда окъуй тургъанында, «Живая классика» Битеуроссей конкурсну регион урумунда алчылыкъны алып, аны бла байламлы «Артекге» да баргъанды.

Озгъан жылда, андан тышында да, «Марафон талантов» эришиуде къырал даражада айырмалы болгъан оналты адамны арасындады. Мындан арысында уа ол литературоведение илму бла кюрешир акъылдады.

Алыкъа ол студент болгъанлы алай кёп заман озмагъан эсе да, окъууун жаратады. Муратына жетер ючюн кёл салып да окъуйду.