Болжаллары озгъан борчланы законнга бузукълукъ этмей жыярча

Къабарты-Малкъарны Жамауат палатасыны жыйылыуунда «Болжалы озгъан борчну тёлеуде инсанланы эркинликлерин эм законлу сейирлерин къоруулауну юсюнден» федерал законнга кийирилген тюрлениулени бла «Микрофинанс ишни бла микрофинанс организацияланы юсюнден» федерал законну тинтгендиле.

Бюгюнлюкде федерал закон коллектор организацияланы ишлерин эсеплейди. Ала уа, белгилисича, инсанладан болжаллары озгъан борчланы къайтарыу бла кюрешедиле. Аны ючюн коллекторла адамла бла тюбешедиле, алагъа телефон бла сёлешедиле, электро эм радиосвязь бла жазып неда айтып сообщенияла жибередиле, ала уа юч жылны ичинде сакъланыргъа керекдиле. Законопроектге тийишлиликде, бу организацияла борчлу адамла бла ишлеп башлардан алгъа Сюд приставланы федерал  службаларына (ФССП), документлени да къошуп, билдириу иерге керекдиле. Службаны управлениялары уа, кеслерини жанындан, аллай кредит эм микрофинанс организацияланы эсеплерге эм официал сайтларында аланы юслеринден информацияны басмаларгъа тийишлидиле. Андан сора да, тюрлениулеге кёре, борчлу инсанны бла кредиторну  электрон почта бла (ол келишимни тауусханда аны жазгъан эсе) эм къырал жумушланы бир порталы бла байламлыкъла жюрютюулерини амаллары да бегитиледиле. Борчу болгъан бла байламлыкъны бир неда талай амал бла жюрютюуге да чек салынады. 

Жыйылыугъа къатышханла чертгенлерича, кредит эм микрофинанс организацияланы бла коллекторланы ишлерине жамауатны жанындан ыразы болмагъан кезиуле асламдыла. Бу тюрлениуле уа аланы араларын сюдге жетдирмей игилендирирге болушурукъдула. Аны бла бирге палатаны членлери бусагъатдагъы законодательство, законопроект да иск болжалны эсеплемегенлерин белгилегендиле. Ол а борчха жыл санлары келген, сакъат, юриспруденция эм финансла жаны бла билимлери болмагъан эм электрон связь бла хайырланалмагъан адамла кирген эселе, халны бютюн къыйын этеди. Законодательствогъа кёре, искни болжалы бошалгъанлыкъгъа борчлу инсан бла ишлерге чек салынмайды. Борч 500 мингден кёп тюйюл эсе, ол сюдню оноуу бла къайтарылыргъа керекди, анга иск болжал салынмайды, кредиторну заявлениясы тамамды. Болсада, гражданланы асламысына ол уллу ахчады, аны ючюн сюдню оноуу бла къайтарыллыкъ борчну ёлчемин азайтыргъа эсгертиу этилгенди. 

Тинтиулени кезиуюнде палатаны членлери кредит эм микрофинанс организацияла ишлерин ачыкъ халда тамамлар ючюн, профессионал коллекторланы борчлу халда коллектор ассоцияциягъа къошаргъа керекди деген оюмгъа келгендиле.